Qazaqstanda polıtseıler sany 100 myń turǵynǵa shaqqanda 471-den 372-ge azaıdy - ІMM
Іshki ister mınıstriniń birinshi orynbasary Marat Qojaev dıplomatııalyq qatynastar ornaǵannan beri Qazaqstan men Fınlıandııa arasyndaǵy yntymaqtastyq ózara túsinistik, senim jáne dostyq atmosferasynda damyp kele jatqanyn atap ótti. Sondaı-aq, ІІM basshylyǵy sheteldik delegatsııany ishki ister organdaryn jańǵyrtý jónindegi baǵdarlamanyń iske asyrylý barysymen tanystyrdy.
«Qurylym ońtaılandyryldy, qyzmetkerler sany qysqardy. Artyq basqarý býyndary men basshylyq laýazymdar joıyldy. Nátıjesinde 100 myń turǵynǵa shaqqanda polıtseıler sany 471-den 372-ge deıin azaıdy. Polıtsııa qyzmetin baǵalaý júıesi qaıta qaraldy. Azamattardyń qaýipsizdigi men halyqtyń senim deńgeıi negizgi krıterıı retinde aıqyndaldy», - dedi Іshki ister mınıstriniń birinshi orynbasary Marat Qojaev.
Ol, sondaı-aq mınıstrlikti qaıta qurýdyń maqsaty – bıýrokratııalyqtan adamǵa baǵyttalǵan jumys modeline kóshý ekenin atap ótti. Onyń aıtýynsha, polıtsııa qyzmetin bıýrokratııadan aryltý boıynsha sharalar qabyldanýda, qyzmetkerlerge artyq júkteme týdyratyn ózekti emes normalar joıylady, sondaı-aq jumys protsesterin avtomattandyrý jáne tsıfrlandyrý, polıtsııaǵa tán emes jáne qaıtalanatyn fýnktsııalardy alyp tastaý júzege asyrylady.
«Qyzmettiń barlyq salalarynda ǵylym men derektermen jumys isteýdiń problemalyq-baǵdarlanǵan tásilderi engizilýde. EYDU elderiniń mysalynda tergeý protsesi jetildirilýde. Qylmystyq sot isin júrgizýdiń úsh býyndy modeli engizildi: polıtsııa materıaldardy jınaıdy, prokýror is júrgizý sheshimderin qabyldaıdy jáne sot úkim shyǵarady. «Kórsetkishter úshin jarys» sharttary alynyp tastalady. Negizgi krıterıı - is boıynsha shyndyqty anyqtaý. Búgin Memleket basshysynyń tapsyrmasy boıynsha qylmystyq jáne qylmystyq is júrgizý kodeksterine revızııa júrgizilýde, onyń sheńberinde azamattardyń quqyqtary men bostandyqtaryn qamtamasyz etý úshin normalar jetildirilýde», - dedi spıker.
Onyń málimetinshe, sheteldik áriptestermen yntymaqtastyq pen ózara baılanys negizinde qylmysqa qarsy kúres salasynda ózara is-qımyl jónindegi 90-nan astam halyqaralyq shart qoldanylady.
«Búgingi tańda biz Germanııa, Frantsııa, Qytaı, AQSh, Túrkııa, Italııa, Chehııa jáne TMD elderiniń polıtsııa vedomstvolarynyń ókilderimen tyǵyz jumys isteımiz. Yntymaqtastyq aıasynda biz qylmyskerlerdi izdestirý boıynsha aqparatpen, qazirgi zamanǵy syn-qaterler men qaýip-qaterlerge qarsy kúreste oń tájirıbemen almasamyz. Sonymen birge bizdi Fınlıandııa polıtsııasynyń tájirıbesi qyzyqtyrady. Bizdiń áriptesterimizge Sizdiń el halqynyń 90% - dan astamy senetinin bilemiz. Bul azamattarmen jumys joǵary kásibı deńgeıde atqarylatynyn aıǵaqtaıdy, - dedi Qojaev.