Qazaqstanda pnevmonııaǵa shaldyqqandar koronavırýspen aýyrǵandardan 2-3 ese kóp

NUR-SULTAN. QazAqparat - Ókpe qabynýyna shaldyqqandar koronavırýspen aýyrǵandardan 2-3 ese kóp. Bul týraly QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Jalpy, eshteńe jasyrylyp qalyp otyrǵan joq. Ókpe qabynýyna shaldyqqandar sanyn da kórsetemiz. Taıaý ýaqytta muny turaqty negizde, naqty málimetterdi usynyp otyrýdy kózdep otyrmyz. Menińshe, bul jerde mundaı derekterdi jarııa etýge eshqandaı kedergi joq. Tek barlyǵy shynaıy aýqymdy túsinýi tıis», - dedi mınıstr búgin Ortalyq kommýnıkatsııalar qyzmetindegi brıfıng barysynda.

Onyń dereginshe, qazirgi ýaqytta pnevmonııaǵa shaldyqqandar sany koronavırýs juqtyrǵandardan áldeqaıda kóp.

«Koronavırýs ınfektsııasy jaǵdaılaryna qaraǵanda ókpe qabynýy 2-3 ese kóp. Qazirgi ýaqytta osyndaı ósim baıqalyp otyr. Sońǵy kezde ólim-jitim de bar. Shynaıy kórinis bolýy úshin, muny da aıtyp otyramyz. Mundaı derekterdi saıtymyzda nemese aqparat kózderinde jarııalaý josparda. Ýaqytyna qatysty aıtar bolsam, kelesi aptada bul málimetterdi qolǵa alyp, shynaıy jaǵdaıdy barlyǵy kórýi úshin jarııa etýge tyrysamyz. Dárigerler mundaı derekterdi kórip otyr. Eger halyqty da ol qyzyqtyratyn bolsa, onda biz usynýǵa daıynbyz», - dedi Alekseı Tsoı.