Qazaqstanda pedofılııa oqıǵalary eki esege artyp otyr - Bas prokýratýra

ASTANA. QazAqparat - Qazaqstanda pedofılııa oqıǵalary jyl sanap artyp keledi. Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR Bas prokýrorynyń orynbasary Andreı Kravchenko málim etti.

«Jynystyq qylmystar onyń ishinde kámelettik jasqa tolmaǵandarǵa qatysty qylmystar sany artýda. Máselen, 2010 jyly eger olardyń sany 1885 kóleminde tirkelse, 2014 jyly eki esege ósti jáne 3623 qylmys jasalǵan. Bıyl alty aıdyń ishinde bul qylmystar 20 paıyzǵa kóbeıgen. Eń qatty alańdatyp otyrǵany, kámelettik jasqa tolmaǵandarǵa qatysty jynystyq zorlaý qylmystarynyń artýy. 2010 jyldan beri mundaı qylmystar eki esege ósip, 491-den 2014 jyly 943-ke deıin ulǵaıǵan. Bıyldyń ózinde balalarǵa qatysty zorlyq boıynsha 726 fakti tirkeldi. Byltyr osy merzimde 485 qylmys tirkelgen bolatyn», - dep atap ótti A.Kravchenko.

Onyń aıtýynsha, ásirese qoǵam arasynda balalardy qatygezdikpen zorlaý jáne ómirlerine balta shabý oqıǵalary úlken alańdaýshylyq týǵyzýda.

«Jambyl jáne Mańǵystaý oblystaryndaǵy oqıǵalardy bilesizder. 13 mamyr kúni Mańǵystaý oblysynda úıiniń mańynda 8 jasar qyzdyń múrdesi tabylǵan bolatyn. Balanyń denesinde túrli jaraqattar boldy. Zorlaǵan jáne ony keıin býyndyryp óltirgen», - dedi Bas prokýrorynyń orynbasary.