Qazaqstanda «Pedagog» kásibı standarty qabyldanady

ASTANA. QazAqparat – «Pedagog» kásibı standartyn qabyldaý boıynsha jumystar aıaqtalýǵa jaqyn. Bul týraly Oqý-aǵartý mınıstri Ashat Aımaǵambetov málim etti, dep habarlaıdy QazAqparat tilshisi.

«Oqý-aǵartý mınıstrligi «Pedagog» kásibı standartyn qabyldaý boıynsha jumystardy aıaqtaýǵa jaqyn. Osy kásibı standartty eskere otyryp, bilim berý baǵdarlamalary, pedagogterdi sertıfıkattaý jáne attestattaý rásimderi, úzdiksiz kásiptik damý mazmuny ázirlenip, jańartylady. Qosymsha pedagog kadrlardy qyzmet babynda joǵarylatý strategııasy qurylady. Kásibı standart bekitilgenge deıin pedagogtermen jáne basqa da múddeli taraptarmen keń talqylaýlar júrgiziledi. Nátıjesinde «Pedagog» kásibı standarty bilim berýdiń barlyq deńgeıindegi pedagogterdiń kásibı damý traektorııasynyń biryńǵaı baǵdaryna aınalady», - dep toqtaldy mınıstr.

Buǵan qosa, brıfıngi barysynda Ashat Aımaǵambetov balabaqsha tárbıeshilerine jalaqy tóleýdiń jańa júıesi engiziletinin málim etti.

Onyń aıtýynsha, mundaı mehanızm qazirgi tańda birneshe balabaqshada synaqtan ótip jatyr.