Qazaqstanda paıdalanylmaı jatqan jerdi memleketke qaıtarý merzimi qysqarýy múmkin

NUR-SULTAN. QazAqparat – Jerdiń tıimdi paıdalanylýy men qorǵalýyn memlekettik turǵyda baqylaýdy jetildirý maqsatynda zań jobasy ázirlenip jatyr, dep habarlaıdy QazAqparat tilshisi.

«Zań jobasy paıdalanylmaıtyn aýyl sharýashylyǵy jerlerin tekserý kezeńderi men alyp qoıý merzimderin qysqartýdy (2 jyldan 1 jylǵa deıin), ǵaryshtyq monıtorıng derekteri boıynsha baılanyssyz baqylaý protsesin avtomattandyrýdy, tekseriletin obektini mátindik habarlamalar arqyly uıaly baılanys arnalarymen habardar etý rásimin avtomattandyrýdy kózdeıdi», - dedi Aýyl sharýashylyǵy mınıstri Saparhan Omarov OKQ-da ótken baspasóz máslıhatynda.

Mınıstr budan bólek Tsıfrlyq damý, ınnovatsııalar jáne aeroǵarysh ónerkásibi mınıstrligimen birlesip, halyqqa qoljetimdi bolatyn tıimdi memlekettik elektrondyq jer kadastryn engizý jumysy júrgizilip jatqanyn baıan etti.

Bul 2023 jyldan bastap qazaqstandyqtar úshin jerdi elektrondy túrde ashyq bólýge kóshýge múmkindik beredi.

«Jer ýchaskelerin berýdiń elektrondyq tártibi jer qatynastary salasyndaǵy bıýrokratııalyq jáne sybaılas jemqorlyq alǵysharttaryn joıyp, jer ýchaskesin alý rásimderiniń ashyqtyǵyn qamtamasyz etedi», - dedi Saparhan Omarov.