Qazaqstanda páter tonaý qylmysy 33,4%-ǵa azaıdy

NUR-SULTAN. QazAqparat – Elimizde turǵyn úıdi tonaý qylmysy 33,4%-ǵa azaıdy. Bul týraly QR ІІM Krımınaldyq polıtsııa departamentiniń asa mańyzdy ister jónindegi aǵa jedel ýákili Saǵyndyq Jantemirov málim etti, dep habarlaıdy QazAqparat tilshisi.

«Qabyldanǵan sharalardyń nátıjesinde sońǵy 5 jylda páter urlyǵynyń sany 33,4%-ǵa tómendedi. Mysaly, 2017 jyly 37893 páter urlyǵy tirkelse, ótken jyly 12655 urlyq jasaldy. Atalǵan kórsetkish bıyl da jaqsaryp keledi. Jyl bastalǵaly páterge urlyqqa túsý qylmysynyń sany 7,1% - ǵa (3357-den 3118-ge deıin) tómendep otyr. Al páter tonaý qylmysyn ashý 1,7% - ǵa (59,0-den 60,7% - ǵa deıin) artty», - dedi Saǵyndyq Jantemirov ІІM-de ótken baspasóz máslıhatynda.

Sondaı-aq, spıker urylar páterdi tonaýdyń aıla-tásilderin jetildirip otyratyndyqtaryn eske saldy.

«Jeke múlikti urlaýda qylmyskerler páterge kirý daǵdylary men tásilderin únemi jetildirip otyrady. Olar zamanaýı tehnıka men uıaly baılanysty paıdalanady. Esik qulpyn ashýǵa arnaıy quraldardy qoldanady. Osy oraıda turǵyndarǵa saq bolýdy eskertemiz», - deıdi ol.

Buǵan deıin QR ІІM ókili jyl basynan beri elimiz boıynsha 600-den astam páter urysynyń ustalǵanyn jetkizdi .