Qazaqstanda parlamenttik tekserý ınstıtýtyn engizý kerek - Álıhan Báımenov

ASTANA. QazAqparat – Elimizge parlamettik tekserý ınstıtýtyn engizý kerek. Bul týraly Jibek Joly telearnasyndaǵy JJ Talk baǵdarlamasyna qatysqan Astana memlekettik qyzmet haby basqarýshy komıtetiniń tóraǵasy Álıhan Báımenov málim etti, dep habarlaıdy QazAqparat tilshisi.

«Halyqaralyq tájirıbede alýan túrli úlgiler bar. Biraq solardyń barlyǵyna ortaq ámbebap qaǵıdalar bar. Sol qaǵıdalar júıelerdiń yrǵaqtyǵyn qamtamasyz etedi. Ol qandaı qaǵıdalar? Ol - bılik tarmaqtarynyń arasyndaǵy tepe-teńdik, olardyń bir-birine táýelsizdigi, bir-birin qadaǵalaý múmkindigi. Qarapaıym tilmen aıtqanda, jeńgen partııa nemese prezıdent úkimetti jasaqtaıdy. Sonymen qatar, halyqtyń ókilidikteri retinde saılanǵan depýtattar bar. Álemde durys jumys jasaıtyn memleket basqarýda osy depýtattar Úkimetti tolyq tekserýge quqyly. Bul turǵyda bizdiń Konstıtýtsııaǵa parlamenttik tekseris nemese parlamenttik tergeý degen ınstıtýt enýi kerek», - dep usynys bildirdi Álıhan Báımenov JJ Talk baǵdarlamasynda suhbat bere otyryp.

Sonymen qatar, ol aldaǵy ýaqytta maslıhat depýtattary tarapynan memlekettik organdarǵa jasalatyn tekseris jumystaryn kúsheıtý kerektigin atap ótti.

«Aldaǵy ýaqytta jergilikti deńgeıdegi bıýdjetterden aılyq alatyn adamdarǵa máslıhat depýtaty bolýǵa quqyq berilmeýi kerek. Eger depýtat sol óńirdiń bıýdjetinen jalaqy alyp otyrǵan adam bolsa, ákimdi qalaı tekseredi? Mundaı bolmaýy tıis», - dedi Álıhan Báımenov.

Aıta keteıik, Jibek Joly telearnasyndaǵy JJ Talk baǵdarlamasynyń búgingi shyǵarylymy QR Parlamenti Senatynyń depýtattaryn saılaý taqyrybyna arnaldy.

Oǵan qatysqan elimizge bilgili zańger, sarapshy jáne saıasatkerler Parlamentti jetildirý modelderi týraly pikir bildirip, oıyn ortaǵa saldy.