Qazaqstanda Parlament pen Úkimet arasyndaǵy ózara is-qımyl artýy múmkin - Ázerbaıjan sarapshysy
Memleket basshysy usynǵan jańa baǵyttarǵa qatysty pikir bildirgen sarapshy-ekonomıst, Ázerbaıjan respýblıkalyq zertteý ortalyǵynyń teń quryltaıshysy Natıg Djafarlı osylaı málim etti, dep habarlaıdy QazAqparat tilshisi.
Onyń aıtýynsha, jaqynda ótken kezekten tys Parlament saılaýy memleket pen qoǵamnyń barlyq salalaryn jan-jaqty ári keshendi damytýǵa múmkindik beretin Qasym-Jomart Toqaevtyń reformalaryna degen senimdi nyǵaıta tústi.
«Zań shyǵarýshy organ quramyn jańartý qoldanystaǵy saıası júıeni túbegeıli jańǵyrtý jáne el damýynyń jańa tujyrymdamasyn bekitý úshin mańyzdy qadam boldy. Saılaý nátıjesi Qazaqstanda kóppartııaly júıeniń paıda bolǵanyn kórsetti. Bul óz kezeginde kóp jyldan beri «saıası turalaýda» bolǵan el úshin jetistik», - dep pikir bildirdi sarapshy.
Natıg Djafarlıdiń paıymynsha, Qazaqstan Prezıdentiniń Parlament aldynda sóılegen sózindegi negizgi oı – reformalardy jalǵastyra otyryp, saıası júıeni odan ári jetildirý. Osy rette sarapshy alǵa qoıylǵan jospardy oryndaý maqsatynda Parlament pen Úkimet arasyndaǵy ózara is-qımyldyń artýy múmkin ekenin atap ótti.
«Qasym-Jomart Toqaevtyń sózindegi mańyzdy tezısterdiń biri - mınıstrler kabınetiniń qyzmeti úshin jaýapkershilikti zań shyǵarýshy organdaǵy saılaý nátıjesinde eń kóp qoldaýǵa ıe bolǵan «Amanat» partııasyna júkteý. Sonymen qatar, mınıstrler kabınetiniń qatelikteri men olqylyqtary úshin saılaýda basym daýys jınaǵan partııanyń jumysymen baılanysty bolady. Bul onyń odan keıin bolýy múmkin saılaýǵa qatysý perspektıvasyna da áser etedi», - dep toqtaldy ol.
Sarapshynyń pikirinshe, Májilistiń jańa quramy básekege qabiletti jáne bıýdjet protsesteriniń ashyqtyǵyn qadaǵalaýda Úkimet pen ákimdikterge joǵary talap qoıa alady. Bul óz kezeginde Úkimettiń tıimdiligin arttyrýǵa, halyqtyń ómir súrý jaǵdaıyn jaqsartýǵa jáne ál-aýqattyń joǵarylaýyna jol bastaıdy.
«Qazaqstan Prezıdentiniń partııalar endi saıası protsester jolymen júredi degen tezısi eldiń saıası bolashaǵy úshin mańyzdy qadam sanalady. Májilistiń sońǵy quramy halyqtyń barlyq ıdeologııalyq kózqarasyn qamtyp, aýqymdy saıası reformalardyń negizinde qalyptasty. Sonyń nátıjesinde JSDP oppozıtsııalyq partııasynyń Parlamentke ótýine múmindik týdy», - dedi Natıg Djafarlı.
Ol atap ótkendeı, Qazaqstan Úkimeti jańa saılanǵan Májilis aldynda ókilettigin toqtatqannan keıin, parlamenttik kópshilik fraktsııasy – «Amanat» partııasy mınıstrler kabınetin jasaqtaýǵa kiristi.
«Úkimet quramynyń az kólemde jańarýy bul Memleket basshysynyń burynǵy mınıstrler kabınetiniń múshelerine degen senimin bildiredi. Alaıda, Prezıdent syn-qaterlerdi eskere otyryp, el aldynda turǵan aýqymdy áleýmettik-ekonomıkalyq reformalardy jalǵastyrý úshin naqty tapsyrma jútkep, qatań talaptar qoıdy.
Jalpy, Prezıdent Toqaevtyń bastamalary bılik tarmaqtaryn sapaly bólip, ony ár taraptan tıimdi baqylaýǵa baǵyttalǵan. Bul Qazaqstandaǵy iskerlik belsendilikti arttyryp, jańa ınvestıtsııalar tartý úshin óte mańyzdy», - dep túıindedi Natıg Djafarlı.
Onyń paıymyna saı, Qazaqstannyń qarqyndy ekonomıkalyq damýy úshin resýrstar men múmkindigi de bar.
Sońǵy 50-60 jylda mundaı úzdiksiz ilgerileý jolynan Ońtústik Koreıa, Sıngapýr jáne Chılı sııaqty elder ótti. Sarapshy Qazaqstannyń da osy elderdiń qataryna qosylýy múmkin ekenine senim bildirdi.