Qazaqstanda para alǵan adam endi eselep aıyppul tóleıdi - Joǵarǵy sot

ASTANA. QazAqparat - Qazaqstan Respýblıkasynyń Joǵarǵy Soty daıyndaǵan «Keıbir sybaılas jemqorlyq qylmystardy qaraý praktıkasy týraly» normatıvtik qaýlyǵa sáıkes, para alǵan adam memlekettiń shyǵynyn ǵana ótemeıdi, para suratqan adam da eselep aıyppul tóleıdi. Bul týraly búgin Joǵarǵy Sottyń tóraǵasy Qaırat Mámıdiń qatysýymen ótken quzyrly organnyń kezekti jalpy otyrysynda Joǵarǵy Sottyń sýdıasy Ádil Quryqbaev málim etti.

«Órkenıetti qoǵam úshin sybaılas jemqorlyqpen kúres - eń ózekti máselelerdiń biri. Sybaılas jemqorlyq - memleketti ishinen joıady jáne ulttyq qaýipsizdigimizge qaýip tóndiretin qoǵamnyń derti. Álemniń kóptegen elderi sekildi, Qazaqstan da sybaılas jemqorlyqtyń aldyn alý, tamyryna balta shabý maqsatyna baǵyttalǵan jumystardy júrgizip keledi. Qazaqstan -burynǵy Keńes Odaǵy aýmaǵynda sybaılas jemqorlyqqa qarsy qoldanylatyn zańdy alǵashqylardyń biri bolyp qabyldaǵan memleket. Onyń ústine, BUU-nyń «Sybaılas jemqorlyqqa qarsy konventsııasyna da» alǵashqylardyń biri bolyp qol qoıyp otyrmyz. Sondyqtan, Qazaqstan Respýblıkasynyń memlekettik saıasatynyń negizi bir baǵyty - osy zulymdyqpen kúresý»,-deıdi Á.Quryqbaev.

Joǵarǵy sottyń sýdıasy sondaı-aq Elbasy N.Nazarbaev usynǵan 5 reformany júzege asyrý úshin belgilengen 100 qadamnyń 15 qadamy memleketti basqarý máselesine arnalǵanyn, sonyń ishinde 13-shi qadam sybaılas jemqorlyqqa qarsy kúresti kúsheıtý jáne jemqorlyqqa baılanysty zańdardy qaıta jetildirýge baǵyttalǵanyn eske salyp ótti. Onyń aıtýynsha, joǵarydaǵy qaýly osy 13-shi qadamnan týyndap otyr jáne der kezinde qabyldanyp otyrǵan qujattardyń biri.

«Bul normatıvtik qaýlyǵy jańa qabyldanǵan Qylmystyq Kodekspen jáne joǵaryda aıtqan konventsııadaǵy keıbir sybaılas jemqorlyqqa baılanysty túsinikterdi úılestire otyryp, daıyndadyq. Normatıvtik qaýly sybaılas jemqorlyq qylmystary týraly qylmystyq zańnamanyń keıbir normalaryn birkelki túsinýge jáne sot tájirıbesinde olardy durys qoldanýǵa septigin tıgizetin úlken qujat bolmaq. Sonymen qatar, qaýlyda paraqorlyqqa baılanysty qylmystyq áreketterge, onyń ishinde para alýdyń aıaqtalý kezeńine, paraqorlyqpen baılanysty qamqorshylyq pen deldaldyqqa jáne taǵy da basqa parqorlyqqa baılanysty týyndaıtyn qylmystyq is árekketterge túsinik berilgen. Osy rette, qaýly paraqorlyq úshin jaýapkershilik para berý áreketi jasalǵanǵa deıin nemese jasalǵannan keıin alǵanyna qaramastan, sondaı-aq parany aldyn ala belgilengen-belgilenbegenine, para berýshiniń múddesi úshin qandaı da bir árekettiń oryndalǵan-oryndalmaǵanyna qaramastan týyndaıtynyn atap kórsetedi. Paranyń aıaqtalý merzimi parany alǵan sátten bastalanytyny, paranyń barlyǵyn aldy ma, joq pa, onyń mańyzdy emes ekenin osy qaýlyda kórsetip otyrmyz. Bul qaýlynyń túsindirmesi - eki jaǵdaıǵa kóp kómektesedi. Birinshiden, kináli dep tanylǵan adamnyń alǵan parasynyń somasy memlekettiń paıdasyna óndiriletin. Ekinshiden, parany eselep aıyp tóleý arqyly óteý qarastyrylǵan»,-dep túsindirdi sýdıa.