Qazaqstanda pandemııa bastalǵaly kásiporyn qyzmetkerleriniń sany 11% qysqardy

NUR-SULTAN. QazAqparat - Qazaqstanda pandemııa bastalǵaly beri kásiporyn qyzmetkerleriniń sany orta eseppen 11%-ǵa qysqardy. Senat janyndaǵy Jas sarapshylar klýbynyń otyrysynda «Atameken» ulttyq kásipkerler palatasy tóraǵasynyń orynbasary Oljas Ordabaev shaǵyn jáne orta bıznes saýalnamasynyń osyndaı nátıjelerimen bólisti, dep habarlaıdy QazAqparat.

Prezıdenttiń tapsyrmasy boıynsha ulttyq kásipkerler palatasy 27 qańtar men 17 aqpany aralyǵynda 50,5 myńǵa jýyq kásipker qatysqan saýalnama júrgizgen bolatyn.

«Turý jáne tamaqtaný jónindegi qyzmetter salalaryndaǵy qyzmetkerlerdiń eń kóbi paıyzdyq ara qatynasy - 19%, oıyn-saýyq jáne demalys salalarynda 20%, sondaı-aq qyzmet kórsetýde 19%-ǵa qysqardy. Respondentterdiń 56%-y pandemııaǵa baılanysty tabysy aıtarlyqtaı azaıǵanyn atap ótti. Sonymen qatar, týrızm salasy eń kóp zardap shekken - 77%, saýda - 63%, oıyn-saýyq jáne demalys - 62% tabysy kemigen», - dep atap ótti sarapshy.

Klýbtyń otyrysy Senat tóraǵasy Máýlen Áshimbaevtyń tóraǵalyq etýimen ótti jáne Qazaqstan ekonomıkasynyń pandemııadan keıingi kezeńdegi úrdisterine, mindetteri men keleshegine arnaldy.

«Pandemııa álemdik ekonomıka men qoǵamdyq ómirdi uıymdastyrýdaǵy belgili bir protsesterdi jedeldetti. Osylaısha, qashyqtyqtan jumys isteý, qashyqtyqtan oqytý, bıznesti tsıfrlandyrý, ınternet arqyly qyzmetter usyný jáne taýarlar satyp alý, resýrstar men tutynýǵa uqypty qaraý bizdiń ómirimizdiń ajyramas bóligine aınalady. Pandemııadan keıingi kezeńdegi damý strategııasy osy jáne basqa da úrdisterdi eskerýi tıis. Jalpy, bilim berý júıesi pandemııadan keıingi kezeńdegi damý strategııasynyń mańyzdy bóligi retinde qarastyrylýy kerek, óıtkeni ol ónerkásip pen óndiristik sektordy bilikti kadrlarmen qamtamasyz etedi», - dedi Máýlen Áshimbaev.

Máýlen Áshimbaev talqylaýdy qorytyndylaı kelip, sarapshylar aıtqan usynys-usynymdar Parlament jumysynda paılanylatyny jáne Ulttyq ekonomıka mınıstrligi nazarǵa alatynyna senim bildirdi.