Qazaqstanda ózge kólik túrlerine qaraǵanda poıyz bıletteriniń baǵasy az kóteriledi - QTJ

ASTANA. QazAqparat - Qazaqstanda poıyz bıletteriniń baǵasy ózge kólik túrlerine qaraǵanda az kóteriledi. Bul týraly «QazAqparat» HAA-nyń resmı saýalyna «Qazaqstan temir joly» kompanııasynyń baspasóz qyzmetinen habarlandy.

«Temirjol kóligimen júrý baǵasyn memlekettik ókiletti organ retteıdi jáne olardyń maquldaýynsyz temirjol ákimshiligi tasymal qunyn ózgertýge quqyǵy joq. Jalpy temirjol bıletteriniń baǵasy ózge kólik túrlerimen salystyrǵanda az kóteriledi. Osy oraıda temirjol elimizde eń áleýmettik baǵdarlanǵan kólik bolyp tabylady»,-dep habarlady ulttyq kompanııadan.

QTJ ókilderi bıylǵy 1 tamyzdan bastap tikeleı halyqaralyq baılanystaǵy Qazaqstan jáne Reseı aýmaǵy boıynsha júretin poıyzdarǵa, sondaı-aq «Jolaýshylar tasymaly» AQ júrdek poıyzdarymen júrýge jeńildikter qarastyrylǵanyn eske salyp ótti.

Jeńildikpen satylatyn bıletterdi www.epay.railways.kz ınternet saıty men termınaldar arqyly jáne jol júrý qujattaryn satatyn kassalardan alýǵa bolady.