Qazaqstanda oıyn mekemeleriniń sany 50 eseden artyq qysqardy
Jyl basynan beri mınıstrlik oıyn bıznesi salasyndaǵy 6 lıtsenzııanyń kúshin sot tártibimen toqtatty. Osyǵan uqsas taǵy 7 uıymǵa qatysty jumys júrgizilip jatyr.
Aıta keteıik, 2022 jyly memlekettik baqylaý aıasynda jospardan tys tekserýler júrgizilip, 7 ákimshilik is qozǵaldy. Nátıjesinde 1 oıyn avtomattary zaly lıtsenzııadan aıyryldy, birinshi ınstantsııa sottyń sheshimimen úsh zaldyń qyzmeti toqtatyldy, 6 ákimshilik aıyppul salyndy. Aldyn alý jumystarynyń qorytyndysy boıynsha 15 býkmekerlik lıtsenzııanyń kúshi joıyldy.
Mınıstrliktiń tikeleı qatysýymen oıyn bıznesi, lotereıa jáne lotereıa qyzmeti salasyndaǵy zańnamaǵa, sondaı-aq ilespe normatıvtik-quqyqtyq aktilerge 62 túzetý engizýdi kózdeıtin 3 zań jobasy ázirlendi. Bul sharalar zańnamany buzǵandarǵa jaýapkershilikti kúsheıtýge, jaǵymsyz áleýmettik jáne ekonomıkalyq saldardyń aldyn alýǵa jáne eskertýge baǵyttalǵan. Qumar oıyndarǵa táýeldik máselesine erekshe nazar aýdarylyp otyr.
Memleket kezeń-kezeńimen iske asatyn sheshimderdi qabyldaı otyryp, osy baǵyttaǵy jumysty kúsheıtedi. Máselen, Qazaqstanda oıyn mekemeleriniń sany 50 eseden astam qysqardy. Buǵan deıin elde 140-qa jýyq kazıno jáne 2 myńnan astam oıyn avtomattary zaly bolǵan. Búgingi tańda 39 lıtsenzııalanǵan mekeme qaldy: 6 kazıno, 10 oıyn avtomattary zaly, 17 býkmekerlik keńse, 6 totalızator. Mınıstrlik depýtattar tobymen birlesip zańsyz oıyn bıznesimen jáne qumar oıyndardyń taralýymen kúresý baǵytynda qosymsha zańnamalyq sharalar ázirlep jatyr.