Qazaqstanda ótken aýyl ákimderiniń saılaýyna halyqaralyq baıqaýshylar qyzyǵýshylyq tanytqan joq - OSK

ASTANA. 10 tamyz. QazAqparat - Respýblıkamyzda ótken aýyl ákimderiniń saılaýyna halyqaralyq baıqaýshylar qatysqan joq. Sebebi olar tarapynan esh qyzyǵýshylyq bolǵan joq. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde aýyl ákimderiniń saılaýyna qatysty ótken brıfıngte QR Ortalyq saılaý komıssııasynyń múshesi Marat Sársembaev málim etti.

«Jalpy halyqaralyq baıqaýshylardyń jergilikti saılaýlarǵa qyzyǵýshylyǵy burynnan kele jatqan tájirıbeden solaı qalyptasqan. Máselen, ótken saılaý naýqanynda, Parlament pen jergilikti máslıhat saılaýlar bir mezgilde ótkende de halyqaralyq uıymdardyń baıqaýshylary parlamenttik saılaýǵa nazar aýdaryp, jergilikti saılaýǵa esh kóńil bólmegen edi. Sonymen qatar, tamyzdyń 5-9 aralyǵynda ótken aýyl ákimderiniń saılaýyna da eshqandaı baıqaýshylar kelgen joq. Eger olar (halyqaralyq sarapshylar-avt.) tarapynan qyzyǵýshylyq tanytylǵan jaǵdaıda esh kedergi bolmas edi, jaǵdaıdyń barlyǵy qamtamasyz etiletin edi», - dedi M. Sársembaev.

Sonymen birge, OSK múshesi jergilikti baıqaýshylar tarapynan saılaý barysy qadaǵalanǵanyn aıta kele, olardyń 1004-i kandıdattarǵa senim bildirgen adamdary, 242-si saıası partııalar men úkimettik emes uıym ókilderi, al 559 adam BAQ ókilderinen turǵanyn atap ótti.

«Jalpylama alǵanda 2 myńǵa tarta azamat aýyl ákimderiniń saılaýyna baıqaýshy retinde qatysty. Olar tarapynan saılaý normalarynyń buzylǵandyǵy týraly eshqandaı da aryz bizge kelip túsken joq», - deıdi M. Sársembaev.