Qazaqstanda ótetin Kóshpendiler oıynyna álemniń 100 elinen sportshylar qatysady

<p>ASTANA. KAZINFORM &mdash; Májilis tóraǵasy Erlan Qoshanov elordada V Dúnıejúzilik kóshpendiler oıyndarynyń bastalýyna qansha kún qalǵanyn kórsetip turatyn keri sanaq taqtasyn saltanatty túrde iske qosý rásimine qatysty. Búginnen sanap bastasaq, Qazaqstanda ótetin kóshpendiler oıyndaryna 171 kún qaldy.</p>

Jıynǵa Dúnıejúzilik etnosport konfederatsııasynyń prezıdenti Bilál Erdoǵan, Týrızm jáne sport mınıstri Ermek Marjyqbaev, Astana qalasynyń ákimi Jeńis Qasymbek, Ulttyq sport qaýymdastyǵynyń prezıdenti Islambek Saljanov qatysty.

Saltanatty rásimdi ashqan Májilis spıkeri jınalǵan qaýymdy Ulystyń uly kúni – Naýryz merekesimen quttyqtap, Dúnıejúzilik kóshpendiler oıyny túrkitildes halyqtardyń ǵana emes, álemniń nazaryn aýdarǵan baıraqty báseke ekenin atap ótti. 
Sondaı-aq Erlan Qoshanov qazirgi ýaqytta elimizde álemdik jarysqa daıyndyq qarqyndy júrgizilip jatqanyn aıtty.

– Osy dúbirli jarysty Qazaqstanda abyroımen ótkizý – barshamyz úshin úlken mártebe, zor jaýapkershilik. Memleket basshysy bul dodany joǵary deńgeıde uıymdastyrýdy tapsyrdy. Biz Kóshpendiler oıynyn sán-saltanatymen laıyqty deńgeıde ótkizemiz dep zor senimmen aıta alamyn. Bul saıys baýyrlas túrki halyqtary arasyndaǵy ózara yntymaqtastyq pen mádenı qarym-qatynasty arttyrýǵa tyń serpin beredi. Elderimizdiń arasyndaǵy rýhanı baılanysty odan ári nyǵaıta túsedi dep senemin, – dedi Májilis spıkeri. 

Qazaqstanda ótetin Kóshpendiler oıynyna álemniń 100 elinen ókilder qatysady dep kútilip otyr. Qazirdiń ózinde 60 eldiń kelisimi bar. Sporttyń 20 túrinen 4 myńǵa jýyq qatysýshy synǵa túsedi. Uly Dala tósin dúbirge bóleıtin mereke bir aptaǵa sozylady.

Saltanatty rásimnen soń meımandar «Naýryz meıramy Astana 2024» qolónershiler jármeńkesin aralap, Ulystyń uly kúnine arnalǵan merekelik kontsertti tamashalady.