Qazaqstanda ótetin is-sharalardy mobıldik qosymshanyń kómegimen bilýge bolady

NUR-SULTAN. QazAqparat – Aqtaýlyq Anelı Rýslanqyzynyń bolashaq mamandyǵy aýdarmashy, al ІT salasy — onyń hobbıi. Jas ónertapqysh «Caspian startup -2019» startaptar baıqaýynyń jeńimpazy atanyp, mobıldi qosymsha ázirlep shyqty. Olaı bolsa Anelı oılap tapqan «Chance» mobıldik qosymshanyń qoldanýshylar úshin qandaı paıdasy bar. Jas mamannyń aldaǵy jospary týraly QazAqparat tilshisi surap bilgen bolatyn.

«Meniń jasym 19-da. Aqtaý qalasyndaǵy fızıka-matematıka mektebin bitirip, qazir Almaty qalasynda aýdarmashy (koreı tili) mamandyǵyn meńgerip jatyrmyn. Men ózim 12 jasymnan haker bolýdy armandadym. Soǵan jaqyn boldym. 10-synypta ınformatıka pániniń muǵalimi jarys bolatynyn aıtyp, meniń qatysqanymdy qalady. Men oılana kele jarysqa qatysý kerek dep uıǵaryp, maǵan mobıldi qosymsha ázirleý ıdeıasy keldi. Nátıjesinde jarysta jeńiske jetken joqpyn, biraq men oılap tapqan eki birdeı mobıldik qosymshany júzege asýyna qoldaý kórsetetin demeýshi taptym. Solaısha demeýshi meniń ІT ıdeıama qoldaý kórsetip «Chance» mobıldik qosymshasy paıda boldy», - dedi Anelı Rýslanqyzy.

Sondaı-aq, jas ІT maman atalǵan mobıldik qosymshanyń kópshilik úshin qandaı paıdasy baryn aıtty.

«Chance» mobıldik qosymshasynda elimizdiń búkil qalalary boıynsha qaı jerde, qandaı is-shara ótetini týraly bilýge bolady. Atap aıtqanda, jarys, konferentsııa, vebınar, mádenı jáne sporttyq is-sharalar, aqyly jáne tegin túrli sala kýrstary, semınar, sheberlik sabaqtary jáne taǵy basqa. ıAǵnı qaı jerde, qandaı shara ótedi, oǵan qalaı barýǵa bolady bárin bir jerden bilýge bolady. Jalpy ózim oqýshy kúnimnen túrli is-sharalarǵa qatysqandy jaqsy kórem jáne jıi qatysamyn. Sol kezde oılaıtynmyn ár qalada ótetin is-sharalardy bir jerge jınaqtasa ǵoı dep. Mobıldik qosymsha jasaýǵa túrtki bolǵan osy oı. 2019 jyly ıdeıa kelip iske kiristim, al qosymsha ótken jyly jumys isteı bastady», - deıdi ol.

Onyń aıtýynsha, búginde mobıldik qosymshany qoldaný aıasy keńeıip keledi. Jáne ony odan ári ilgeriletý maqsatynda 6 adam eńbektenip jatyr. Sondaı-aq, mobıldi qosymshany Android jáne iOS platformasynan júkteýge bolady.

«Qalalarda ótetin is-sharalar týraly uıymdastyrýshylarmen aldyn ala habarlasyp, aqparatty mobıldik qosymshaǵa júkteımiz. Keıde ózim jarııalaımyn, keıde áriptesterim júkteıdi. Buǵan deıin jasap shyqqan dúnıemizdi jarnamalaǵan joqpyz. Endigi ýaqytta jarnamalap, ony qoldanýshylar sanyn kóbeıtkimiz keledi. Alda jospar kóp, sonyń biri mobıldik qosymshanyń fýnktsııasyn keńeıtý. Sondaı-aq, ІT salasyna jaqyn bolsamda, aýdarmashy mamandyǵyn ıgerip jatyrmyn. ІT-men qatar tildi de úırenip, jan-jaqty bolǵym keledi», - deıdi stýdent.