Qazaqstanda óte baı adamdar paıda boldy, olardyń halyqqa kómektesetin kezi keldi – Prezıdent

NUR-SULTAN. QazAqparat – Memleket basshysy Qasym-Jomart Toqaev Májilis otyrysynda «Qazaqstan halqyna» qoǵamdyq álemýettik qoryna turaqty jarna aýdaratyn iri kompanııalar tizimin bekitýdi tapsyrdy, dep habarlaıdy QazAqparat.

«Bul Prezıdenttiń nemese Úkimettiń nemese basqa memlekettik organnyń qory emes. Bul barlyq qazaqstandyqtardyń qory, halyqtyń qory. Ol ákimshiliktiń nemese Úkimet janynda jumys istemeıdi. Bedeldi baqylaý keńesi qurylady, ádil jaýapty basshyny taǵaıyndalady, onyń qyzmetiniń tolyq ashyqtyǵyn, eseptiligin jáne qoǵamnyń baqylaýynda bolýyn qamtamasyz etemiz. Josparlar, bıýdjet jáne jobalar saıtta jarııalanady. Barlyq aqparat ashyq bolady. Qordy qarjylandyrý jeke jáne memlekettik kózderden júzege asyrylady», - dedi Memleket basshysy.

Prezıdenttiń aıtýynsha, qorǵa halyqaralyq qaıyrymdylyq uıymdarynyń kómegin tartý da josparlanýda.

«Bul qorǵa lotoreıalyq qyzmet operatorynyń, stavkalardy esepke alý ortalyǵynyń jáne basqa monopolısterdiń mindetti aýdarymdary túsip otyrady. Árıne, biz iri bıznes tarapynan aýqymdy jáne turaqty, astyn syzyp aıtaıyn, turaqty aýdarymdardy kútemiz.

Tuńǵysh Prezıdent – Elbasynyń arqasynda elimizde óte tabysty kompanııalar toby jáne tipti halyqaralyq ólshemder boıynsha da óte baı adamdar paıda boldy. Endi olardyń Qazaqstan halqyna qurmet kórsetip, oǵan júıeli jáne turaqty negizde kómektesetin kezi jetti dep sanaımyn. Sondyqtan Úkimet kompanııalar tobyn anyqtap, qorǵa jyl saıyn aýdarylatyn jarnalar mólsherin bekitýi kerek. Oǵan qosa, úlken qarajatqa ıe bolyp, kóleńkede júrgen tulǵalardyń da belsendi qatysýyn kútemin. Bul qor qoǵamdy toptastyrýdyń taǵy bir quralyna aınalyp, azamattarda áleýmettik ádilet sezimin nyǵaıta alatynyna senimdimin», - dep túıindedi Q. Toqaev.

Buǵan deıin Prezıdent «Qazaqstan halqyna» qoǵamdyq áleýmettik qorynda qaı sanatqa kómek kórsetiletinin aıtqan edi.