Qazaqstanda otbasyna zorlyq-zombylyq kórsetkender úshin saýyqtyrý baǵdarlamasy ázirlenbek

NUR-SULTAN. QazAqparat – Elimizde otbasylyq zorlyq-zombylyq kórsetýshilerge arnalǵan saýyqtyrý baǵdarlamasyn ázirleý qaralyp jatyr. Bul týraly QR ІІM Ákimshilik polıtsııa komıteti tóraǵasynyń orynbasary Alekseı Mılıýk málim etti, dep habarlaıdy QazAqparat tilshisi.

«Áıeline qol jumsaıtyn er adamdardyń 80 paıyzy mas bolyp shyǵady. Jáne olardyń kóbiniń turaqty jumysy joq. Ókinishke qaraı, onyń arty ajyrasýǵa alyp keledi. Ótken jylǵy statıstıkaǵa sáıkes, ajyrasqandar nebary 1-4 jyl ǵana otbasy bolyp ómir súrgen. Byltyr elimizde osyndaı 14 700 jaǵdaı tirkeldi. Al 2 300 jup bir jylǵa da jetpeı ajyrasyp ketken. Osy oraıda bizdiń mınıstrlik áleýmettik-otbasylyq máseleni ońaltý maqsatynda memlekettik saıasatty túbegeıli ózgertý máselesin ashyq qarastyryp jatyr», - dedi A. Mılıýk ІІM-de onlaın ótken baspasóz máslıhatynda.

ІMM ókiliniń málimdeýinshe, ajyrasýmen is bitpeıdi, onyń arty balanyń áke-sheshesiz ósýine, alımenttiń tólenbeýi men basqa da máselelerge ákeledi.

«Bizdiń paıymdaýymyzsha, erli-zaıyptylarǵa arnalǵan psıhologııalyq, saýyqtyrý jáne quqyqtyq qoldaý kórsetetin keshendi jańa jospar ázirleý kerek. Sonymen qatar, qazirgi ýaqytta depýtattyq korpýspen birlesip, zardap shegýshilerden bólek, zorlyq-zombylyq kórsetýshilerge de arnalǵan saýyqtyrý baǵdarlamasyn engizý máselesi qaralyp jatyr. Jáne bul bastama otbasy ınstıtýty rólin arttyra túsý týraly zańnama aıasynda júzege asyrylady», - deıdi ol.

Ákimshilik polıtsııa komıteti tóraǵasynyń orynbasary búginde el boıynsha qıyn jaǵdaıǵa tap bolǵan 3 myńnan astam áıeldiń daǵdarys ortalyqtaryna jiberilgenin aıtty.