Qazaqstanda otbasyn qoldaý jónindegi memlekettik baǵdarlama ázirleý usynyldy

NUR-SULTAN. QazAqparat – Otbasyn qoldaý jónindegi memlekettik baǵdarlama ázirleý qajet. Mundaı pikirdi M.Áýezov atyndaǵy Ádebıet jáne óner ınstıtýtynyń dırektory Kenjehan Matyjanov bildirdi, dep habarlaıdy QazAqparat tilshisi.

«Álem elderi eki úlken júıege bólinip otyr. Birinshisi - anglo-saksondyq júıe, ekinshisi - shyǵystyq júıe. Sonymen qatar shyǵystyq júıege skandınavııalyq elder qosylady. Bulardyń bilim berý, tárbıe berý isindegi eń basty trendi - tárbıege beriledi. Sondyqtan bizdiń qazirgi memlekettik bilim berý jáne tárbıe saıasatynda osy trendke, aldymen, tárbıeni shyǵarýymyz kerek. Sonda ǵana jastarymyzdyń, bolashaq qoǵamnyń bolmysynyń alǵysharttary qalyptasady», - dedi ol Otbasy kúni aıasynda ótken dóńgelek ústel otyrysynda.

Onyń paıymynsha, otbasynyń negizgi túbirin kapıtalızm joıyp jiberdi. Kapıtalızm paıda bolǵannan keıin jurt balalaryn otbasynan ajyratyp, balabaqshaǵa, mektepke berdi. Sóıtip, ata-analar bala tárbıeleý isin balabaqsha men mektepke artyp qoıdy.

«Al qazirgi pandemııa kezeńinde búkil álem ózderiniń burynǵy memlekettik saıasattaryn qaıta qarap jatyr. Demek, qazir otbasyna úlken salmaq túsip otyr. Balany oqytý da, tárbıeleý de ata-ananyń moınyna artyldy. Endi biz qalasaq ta, qalamasaq ta otbasyna kómek kórsetýdi oılastyrýymyz kerek. Menińshe, Memleket basshysynyń ótkendegi Joldaýyn negizge ala otyryp, memlekettik turǵydan otbasyn qoldaý jónindegi baǵdarlama jasaqtaǵan durys bolar edi», - dedi Kenjehan Matyjanov.