Qazaqstanda orys tildi mektepterdiń azaıǵanyn aıtqan reseılik konsýl qyzmetinen ketti
Almatydaǵy RF Bas konsýly Evgenıı Bobrovtyń pikiri reseılik BAQ-ta jarııalanǵan. Ol orys tilin qoldaný men úırený deńgeıi tómendep kele jatqanyn, orys tilindegi mektepter men synyptar azaıyp jatqanyn aıtqan edi.
Osyǵan baılanysty jýrnalıster Syrtqy ister mınıstrliginiń qandaı pikirde ekenin surady.
«Múmkin ol kisi tolyq aqparatty bilmeıtin shyǵar. Almatyda jumys istegendikten, Almatynyń aqparatymen shektelgen bolar. Biraq aıtaıyn degenim, ol kisi 26 tamyzdan beri Qazaqstanda jumys istemeıdi. Qazir ol Bas konsýl emes», - dedi A. Smadııarov mınıstrlikte ótken aptalyq brıfıngte.
Sonymen birge, resmı ókil Qazaqstan mektepteri týraly Oqý-aǵartý mınıstrliginiń derekterin jetkizdi.
«Qazaqstanda 7 711 memlekettik mekteptiń 3 957-si qazaq tilinde, 1 203-i orys tilinde, al 2 551 mektep – qazaq jáne orys tilderinde aralas oqytady. Bul - óte úlken kórsetkish», - dedi A. Smadııarov.
Jýrnalıst: Osyndaı laýazymdy tulǵalardyń Qazaqstannyń ishki máselesine qandaı da bir baǵa berip, pikir bildirýin sizder qalaı baǵalaısyzdar?
A. Smadııarov: Árıne, ol durys emes.
Jýrnalıst: Shara qoldanasyzdar ma?
A. Smadııarov: Qazir ol Qazaqstanda joq, ketip qaldy.
Jýrnalıst: Osy oqıǵadan keıin ketti me?
A. Smadııarov: Eshteńe aıta almaımyn.