Qazaqstanda ortaq shyǵyndardy tólemeıtin páter ıeleri jaýapqa tartylýy múmkin

ASTANA. QazAqparat - Qazaqstanda turǵyn úı-kommýnaldyq sharýashylyq salasyna júrgiziletin reforma aıasynda kóppáterli turǵyn úılerdi kútýge jumsalatyn shyǵyndardy tóleýden jaltarǵan páter ıelerin ákimshilik jaýapkershilikke tartý usynyldy, dep habarlaıdy QazAqparat tilshisi.

«Úıdi kútip ustaýǵa ketken shyǵyndardy tóleýden jaltaratyn páter ıeleri úshin ákimshilik jaýapkershilik engizýdi usynamyz.  Qazirgi ýaqytta úıdi paıdalaný úshin jalpy tarıf tólenedi, biraq páter ıeleri bul tarıfti kóterýge árdaıym daıyn bolmaıdy. Bul olardyń jeke menshigi, sondyqtan zańnamaǵa páter ıeleriniń tutas úıdi kútýge jumsalatyn shyǵyndardy tóleýi úshin jaýapkershilik engizýimiz qajet», - dedi «Turǵyn úı kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ Turǵyn úı sharýashylyǵy departamentiniń dırektory Mádına Mýrsakına Astanada ótken «TKSh-EKSPO 2017» halyqaralyq forýmynda.

Onyń aıtýynsha, kúrdeli jóndeý jumystary úshin mindetti jarna júıesin retteý qajet.

«Bul norma qazirgi zańda da kórsetilgen, biraq jumys istemeıdi. Arnaıy qurylǵan jumys tobynyń sarapshylary normany qaıta qaraıdy», - deıdi sarapshy.

Sondaı-aq, turǵyn úı ınspektsııasyna  qosymsha quzyrettilik berý usynylyp otyr.

«Olar úıdi kútýge jumsalatyn ortaqy shyǵyndardan jaltarǵan páter ıelerin ákimshilik jaýapkershilikke tartatyn bolady. Keshe ǵana semınarda TKSh salasyndaǵy eýropalyqtardyń tájirıbesin talqyladyq. Onda ortaq tólemderden qashqandardyń páterlerin alyp qoıady. Mundaı qatań sharalar Qazaqstanda bolmaıtyn shyǵar, biraq Eýropada bar», - dep atap ótti M.Mýrsakına.