Qazaqstanda órt sóndirý tehnıkasyna qatysty eki tomdyq oqýlyq ázirlendi
QR TJM Kókshetaý tehnıkalyq ınstıtýty men Belarýs TJM AQÝ Gomel fılıaly birlesken avtorlyq ujym «Órt avtomobıliniń júrgizýshisi» atty eki tomdyq oqýlyǵyn jazyp bitirdi.
Shyǵarmashylyq jumysqa jedel-taktıkalyq pánder kafedrasynyń bastyǵy R.Baımaǵanbetov pen aǵa oqytýshy M.Seıdalın, sondaı-aq Belarýs TJM azamattyq qorǵaý ýnıversıtetindegi áriptesterimiz V.Kopytkov pen V.Bodnarýktar qatysty.
«Órt sóndirý tehnıkasynyń málimetter keshenin qurý maqsatynda qolǵa alynǵan oqýlyqta órt sóndirý avtomobılderiniń jiktelýi, qurylysy, baılanys quraldary, aqaýlar jáne olardy joıý ádisteri jınaqtalǵan. Qundy kitap órt-tehnıkalyq beıini boıynsha bilim beretin mekemelerdiń kýrsanttary men tyńdaýshylaryna, qyzmeti tabıǵı jáne tehnogendik sıpattaǵy tótenshe jaǵdaılardyń aldyn alýǵa jáne joıýǵa baǵyttalǵan aýmaqtyq bólimshelerdiń jáne óz qyzmetiniń túri boıynsha órt tehnıkasyn ázirleýmen jáne paıdalanýmen baılanysty basqa da mekemelerdiń qyzmetkerlerine kómek kórsetedi», delingen habarlamada.
Birinshi tomda órt sóndirý avtomobılderin ornatý jáne paıdalaný máseleleri, aqaýlyqtar jáne olardy joıý tásilderi, avtotsısternalarmen jumys isteý kezindegi qaýipsizdik sharalary kórsetilgen.
Ekinshi tom órt sóndirý avtomobılderin jikteýge arnalǵan. Sondaı-aq órt sóndirý avtomobılderiniń materıaldyq bóliginiń máseleleri, paıdalaný erejeleri kórsetilgen. Ár tom 50 danadan basylyp shyǵarylady.