Qazaqstanda organıkalyq ónimder týraly jańa zań jobasy ázirlendi
Bul zań jobalaryna senatorlar bastamashyl boldy. Іs-shara barysynda Senat tóraǵasy «Qazaqstan-2050» Strategııasynda elimizdi ekologııalyq taza ónimder naryǵynda jahandyq deńgeıge kóterý mindeti belgilenin aıtty. El Prezıdenti de óz Joldaýynda osy máselege nazar aýdarǵany belgili.
«Memleket basshysy Qasym-Jomart Toqaev halyqqa arnaǵan Joldaýynda bul máselege arnaıy toqtalyp, elimizdiń aýyl sharýashylyǵyndaǵy áleýeti jáne organıkalyq ónim óndirý múmkindigi tolyq paıdalanylmaı otyrǵanyn atap ótti. Qazirgi tańda organıkalyq ónim óndirý naryǵynda uzaq merzimdi ósý trendi baıqalady. Sondyqtan bul salanyń damý múmkindigi óte joǵary deýge tolyq negiz bar», – dedi Máýlen Áshimbaev.
Senat Spıkeri óz sózinde elimizde organıkalyq ónim óndirý salasy boıynsha aıtarlyqtaı jumys atqarylǵanyn aıta kele, bul baǵytta ózekti túıtkilder de bar ekenin tilge tıek etti. Onyń ishinde zańnamalyq retteý máselesiniń mańyzy joǵary. Sondyqtan senatorlar osy saladaǵy zańdardy jetildirý úshin birqatar zań jobalaryna bastamashyldyq jasady.
Soǵan sáıkes, «Organıkalyq ónim óndirý jáne onyń aınalymy týraly», «Qazaqstan Respýblıkasynyń keıbir zańnamalyq aktilerine organıkalyq ónimderdi óndirý jáne olardyń aınalymy týraly ózgerister men tolyqtyrýlar engizý týraly» jáne «Qazaqstan Respýblıkasynyń Ákimshilik quqyq buzýshylyq týraly kodeksine tolyqtyrýlar engizý týraly» zań jobalaryna jańashyldyqtar engizý kózdelip otyr.
Jańa normalardyń bári organıkalyq ónim óndirýshiler úshin qolaıly jaǵdaı jasaýǵa jáne osyndaı ónimderdi tutynýshy azamattardyń suranystaryn qanaǵattandyrýǵa arnalǵan.
Atap aıtqanda, memleketke ótpeli kezeńniń shyǵystaryn sýbsıdııalaý usynylady. Óıtkeni aýylsharýashylyq taýarlaryn óndirýshiler birneshe jyl boıy ónim ala almaýy múmkin. Soǵan sáıkes ótpeli kezeńge tap bolyp, bos qalǵan aýyl sharýashylyǵy jerlerinen paıda da kóre almaıdy.
Zań jobasyn talqylaý barysynda senator Aqylbek Kúrishbaev taǵy bir jańashyldyqqa toqtalyp ótti. Ol – organıkalyq ónimdi mindetti sertıfıkattaýdan bas tartý. Álemdik tájirıbege sáıkes, sońǵy daıyn ónim emes, tek organıkalyq ónimdi óndirý úderisi ǵana sertıfıkattalady. Mundaı shara ónim óndirýdiń ózindik qunyn tómendetedi jáne sharýalardy qosymsha qarjylyq júktemeden bosatýǵa múmkindik beredi. Nátıjesinde ónimdi, ásirese, ishki naryqta qoljetimdi baǵamen ótkizýge jol ashylady.
Zań jobalaryn talqylaýǵa Aýyl sharýashylyǵy mınıstri Erbol Qarashókeev, agrarlyq sektor mamandary, BUU Azyq-túlik jáne aýyl sharýashylyq uıymynyń Qazaqstandaǵy ókili, Qazaqstanda organıkalyq ónim óndirýshiler odaǵynyń, Ulttyq agrarlyq ǵylymı-bilim ortalyǵynyń, «Qazaqstan-Germanııa agrosaıası dıalogy» jobasynyń ókilderi jáne taǵy basqa osy saladaǵy sarapshylar qatysty.
Atalǵan zań jobalary Májilistiń qaraýyna bıylǵy jeltoqsan aıynda engizilmek.