Qazaqstanda onkologııalyq dertter kóbine ekinshi satysynda anyqtalady

ASTANA. QazAqparat – 2021 jyldan beri qaterli isikke shaldyqqan naýqastarǵa 12 848 ota jasalǵan. Bul týraly Densaýlyq saqtaý mınıstrligi Medıtsınalyq kómekti uıymdastyrý departamentiniń dırektory Azamat Dúısenovtiń tilshi saýalyna bergen jaýabynda aıtylǵan, dep habarlaıdy QazAqparat tilshisi.

«Hırýrgııalyq aralasý qaterli isikterdi emdeýdiń negizgi ádisteriniń biri sanalady jáne is júzinde barlyq onkologııalyq naýqastarǵa túrli kólemde jáne sáýlelik, hımıoterapııamen ártúrli kombınatsııada jasalady. Tek hırýrgııalyq emdeý kóbine onkologııalyq aýrýdyń erte satysynda jasalady. 2021 jyly tek hırýrgııalyq em alǵan patsıentterdiń sany 5 306 adamdy qurady. Onyń ishinde alǵash osyndaı dert anyqtalǵan naýqastardyń úlesi – 15,1 paıyz.

2022 jyly 4 965 adamǵa ota jasaldy, onda alǵash anyqtalǵandardyń sany – 13 paıyz. Al 2023 jyldyń 6 aıyndaǵy kezeńde tek hırýrgııalyq em alǵan patsıentter sany 2 577 (alǵash anyqtalǵandardyń úlesi -12,9%) qurady», - dep jaýap bergen Azamat Dúısenov.

Onyń dereginshe, Qazaqstanda onkologııalyq dertter kóbine ekinshi satyda anyqtalady.

«Qazaqstanda kóbinese qaterli isikter qaterli protsestiń II satysynda dıagnoz qoıylady. Mundaılardyń úlesi 2021 jyly – 31,9%, 2022 jyly 30,3% qurady», - delingen jaýapta.