Qazaqstanda óńirlerdiń ınvestıtsııalyq reıtıngteri engiziledi

NUR-SULTAN. QazAqparat - QR Premer-Mınıstri Asqar Mamınniń tóraǵalyǵymen ótken Investıtsııalyq shtab otyrysynda ınvestıtsııalar tartý jónindegi jańa tásilderdi iske asyrý barysy qaraldy, dep habarlaıdy QazAqparat Úkimettiń resmı saıtyna silteme jasap.

Atalǵan tásilder QR Prezıdenti janyndaǵy Reformalar jónindegi Joǵary Keńes otyrysynda tanystyryldy.

Ulttyq ekonomıka mınıstri Áset Erǵalıev ınvestıtsııalar tartý jónindegi qoldanystaǵy sharalardyń tıimdiligin keshendi baǵalaý maqsatynda óńirlerdiń ınvestıtsııalyq reıtıngin engizý josparlanyp otyrǵanyn aıtty. Ol ınvestorlarmen jumys isteý boıynsha neǵurlym tıimdi praktıkany aıqyndaýǵa múmkindik beredi, sondaı-aq jergilikti bılik organdarynyń jumysyn yntalandyrady. Reıtıng saýalnama ádisimen alynǵan málimetter, sondaı-aq statıstıkalyq derekter men saraptamalyq baǵalaý negizinde 50 ındıkatordan turady.

Óńirlerdiń ınvestıtsııalyq reıtıngi men Investıtsııalar jónindegi ulttyq baıandamany ár jyldyń 1 toqsanynda shyǵarý josparlanyp otyr. Ulttyq baıandamanyń qurylymy eki apta ishinde Dúnıejúzilik banktiń, Eýropa qaıta qurý jáne damý bankiniń, Azııa damý bankiniń sarapshylarymen kelisiletin bolady. Alynǵan usynymdardy eskere otyryp, Ekonomıkalyq zertteýler ınstıtýty «Kazakh Invest» UK» AQ-men birlesip, reıtıngtiń birinshi shyǵarylymy men 2020 jylǵa arnalǵan baıandamany daıyndaıdy.

Premer-Mınıstrdiń orynbasary – syrtqy ister mınıstri Muhtar Tileýberdi, Strategııalyq josparlaý jáne reformalar jónindegi agenttiktiń tóraǵasy – «Astana» halyqaralyq qarjy ortalyǵynyń (AHQO) basqarýshysy Qaırat Kelimbetov pen «Kazakh Invest» UK» AQ basqarma tóraǵasy Meıirjan ıÝsýpov «Business Connect» AHQO bólimshesi men «Kazakh Invest» UK» AQ sarapshylarynan quralǵan «Task Force» arnaıy komandasynyń jumys tártibi týraly baıandady. Saýda jáne ıntegratsııa mınıstrliginiń usynysy boıynsha atalǵan komandaǵa «Qaztrade» saýda saıasatyn damytý ortalyǵy» AQ ókilderi de kiredi.

«Task Force» Úkimet atynan sheteldik ınvestorlarmen biryńǵaı kelissóz júrgizýshi retinde áreket etedi, strategııalyq ınvestıtsııalyq kelisimderdiń jobalaryn qalyptastyryp, ınvestıtsııalyq jobalar jónindegi jumysqa ortalyq memlekettik jáne jergilikti atqarýshy organdardy, kvazımemlekettik sýbektilerdi tartady, Investıtsııalyq shtabtyń sheshiminen keıin operatsııalyq qyzmet bastalǵanǵa deıin ınvestorlardy súıemeldeıdi.

Indýstrııa jáne ınfraqurylymdyq damý mınıstri Beıbit Atamqulov 2021-2025 jyldary ónerkásipte, qurylys salasynda, kólik sektorynda, jer qoınaýyn paıdalanýda jáne qorǵanys-ónerkásip kesheninde jalpy somasy 17,6 trln teńge bolatyn jeke ınvestıtsııalarǵa 819 jobany iske asyrý josparlanǵanyn atap ótti. Osy jyly negizgi kapıtalǵa ınvestıtsııalardyń nysanaly kólemi 6 trln teńge mólsherinde belgilengen. «QazMunaıGaz» UK» AQ basqarma tóraǵasy Alık Aıdarbaev kompanııanyń ınvestıtsııalyq portfelinde jalpy somasy 58,1 trln teńge bolatyn 57 joba bar ekenin atap ótti. Kaspıı qaırańynda Abaı, Isataı, Jeńis, Ál-Farabı, Qalamqas-teńiz, Hazar jáne Hvalynskoe sekildi jer qoınaýyn paıdalanýdyń ınvestıtsııalyq jobalaryn iske asyrý máseleleri pysyqtalýda. Bıyl Qazaqstan – Qytaı munaı qubyryn salý, Kaspıı teńiziniń Ázerbaıjan sektoryndaǵy Absheron jáne Babek ken oryndarynda ózdiginen kóteriletin qalqymaly burǵylaý qondyrǵysyn salý jáne túrlendirý, Almaty qalasyn gazdandyrý, Qara teńiz óńirindegi bólshek saýda jelisin damytý, KPI qajettilikteri úshin syǵylǵan aýa óndirý qondyrǵysyn salý aıasynda revers ınvestıtsııalyq jobalaryn aıaqtaý josparlanyp otyr. Nur-Sultan qalasynyń ákimi Altaı Kólginov aldaǵy 5 jylda ónerkásip, saýda jáne logıstıka, qurylys ındýstrııasy, elektr energetıkasy, bilim berý, medıtsına jáne sport salalarynda 18 myń jańa jumys ornyn qura otyryp, jalpy somasy 2 trln teńge ınvestıtsııaǵa 125 jobadan turatyn pýl qurylǵanyn atap ótti. Osy jyldyń basynan beri ınvestıtsııalardyń 16,4%-ǵa ósýi baıqalady. Bıyl elordanyń negizgi kapıtalyna barlyǵy 1,26 trln teńge ınvestıtsııa tartý josparlanýda. Almaty oblysy ákiminiń orynbasary Serik Turdalıev aldaǵy bes jylda óńirde mashına jasaý, qurylys materıaldaryn óndirý, aýyl sharýashylyǵy, balyq sharýashylyǵy, azyq-túlik ónimderin óndirý, TMK, logıstıka, jańartylatyn energetıka jáne t. b. salalarda 1,7 trln teńgeden astam somaǵa 150 jobany iske asyrý kózdelgenin aıtty. Bıyl óńirge 453 mlrd teńge ınvestıtsııa tartý josparda bar. «Іskerlik belsendilikti qalpyna keltirý jáne ekonomıkanyń odan ári sapaly ósýi úshin ishki jáne syrtqy ınvestıtsııalardy tartý boıynsha júıeli jumys júrgizý qajet», — dedi A. Mamın.