Qazaqstanda ónerkásip óndirisi 2,7%-ǵa ósti

ASTANA. QazAqparat - Qazaqstan ekonomıkasynda 2019 jyldyń ekinshi aıynyń qorytyndysy boıynsha ekonomıkanyń kóptegen salalarynda ósim baıqaldy, dep habarlaıdy QR Ulttyq ekonomıka mınıstrliginiń baspasóz qyzmeti.

Baspasóz málimetterine qaraǵanda, qańtar-aqpan aılarynda ónerkásip óndirisiniń ósimi 2,7% qurady. Aýyl sharýashylyǵyndaǵy ósim - 3,6%, qurylysy salasynyń ósimi - 2,0%, qyzmet kórsetý salasynda 3,9% boldy.

Sonymen qosa, bıyl sapaly ósim óńdeý salalary, qurylys jáne ınvestıtsııalar, sondaı-aq negizinen ShOB shoǵyrlanǵan qyzmet kórsetý sektory arqyly qamtamasyz etilýi tıis. Bul oraıda jańa bastamalar boıynsha bólinetin bıýdjet qarajaty ekonomıkaǵa, halyqtyń tabysyna, sonymen qatar ınvestıtsııalyq belsendilikke qoldaý kórsetedi.

Bıyl Úkimet pen Ulttyq Bank onyń ishinde, halyqtyń ál-aýqatyn arttyrýǵa, ekonomıkalyq ósim sapasyn kóterýge, ınflıatsııalyq protsesterdi tómendetýge jáne qarjy naryǵynyń turaqtylyǵyn qamtamasyz etýge baǵyttalǵan makroekonomıkalyq saıasatty júrgizýde ózara baılanysty kúsheıtedi.