Qazaqstanda ónerkásip qurylymy túbegeıli ózgermek

ASTANA. QazAqparat – Úkimette Premer-Mınıstr Álıhan Smaıylovtyń tóraǵalyǵymen ótken keńeste Óńdeý ónerkásibin damytýdyń 2023-2029 jyldarǵa arnalǵan tujyrymdamasynyń jobasy qaraldy. Bul týraly QazAqparat Úkimettiń resmı saıtyna silteme jasap habarlaıdy.

Indýstrııa jáne ınfraqurylymdyq damý mınıstri Marat Qarabaev Tujyrymdamanyń jobasyn tanystyra otyryp, onyń orta jáne joǵarǵy dárejede daıyndalatyn ónimderdi shyǵarýǵa baǵdarlanǵan tehnologııalyq ozyq ónerkásip qurýǵa baǵyttalǵanyn atap ótti.

Salany damytýdyń júıeli sharalarynyń ishinde ol óndiristerdi shıkizatpen qamtamasyz etýdi, jańa ken oryndaryn ıgerýdi, ónerkásiptik ınfraqurylymdy damytýdy jáne iri kásiporyndardyń aınalasynda ShOB beldeýin qurýdy atap ótti.

Tujyrymdama jobasy óńdeýshi ónerkásip jobalaryn 500 mlrd teńgeden astam somaǵa qarjylandyrýdy kózdeıdi.

Qarastyrylyp otyrǵan kezeńde 147 myń jumys ornyn qurýǵa múmkindik beretin jalpy quny 33,1 trln teńgege 868 jańa joba iske qosylady degen boljam bar.

Barlyq josparlanǵan is-sharalardy júzege asyrý nátıjesinde óndiristiń naqty ósýin 2029 jyly 1,5 ese, al negizgi kapıtalǵa salynatyn ınvestıtsııalardy 19,8 trln teńgege deıin jetkizý josparlanǵan.

Premer-Mınıstr Álıhan Smaıylov Tujyrymdama jobasy Qazaqstannyń ónerkásip qurylymyn túbegeıli ózgertýge baǵyttalǵanyn, onda óńdeýshi sektor negizgi oryndy ıelenetinin atap ótti.

Jalpy, keńeske qatysýshylar qujatty maquldady. Álıhan Smaıylov Indýstrııa jáne ınfraqurylymdyq damý mınıstrligine qujatty múddeli memlekettik organdarmen kelisip, Úkimet Apparatyna engizýdi tapsyrdy.