Qazaqstanda ónerkásip qaldyqtarynyń mólsheri artyp barady

ASTANA. QazAqparat - QR Energetıka vıtse-mınıstri Ǵanı Sádibekov «Parnıktik gazdar men ozondy buzatyn zattardy retteý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasyn usyndy, dep habarlaıdy «QazAqparat» HAA tilshisi.

Onyń aıtýy boıynsha, Qazaqstanda jınalyp qalǵan qatty turmystyq qaldyqtardyń mólsheri 100 mln tonnaǵa jetken.

«Qalǵandary  ónerkásiptik qaldyqtar. Biz atalǵan qaldyqtardyń mólsheri artyp kele jatqanyn baıqap otyrmyz. Ónerkásiptik qaldyqtardy qaıta óńdeý maqsatynda óńdeýshi kásiporyndardyń saqtaý merzimin ózgertýdi durys dep esepteımiz. Qaldyqtar boıynsha máselelerdi memlekettik qoldaý bar mańyzdy tizimge engizýdi usynamyz. Sonymen qatar, qaldyqtardy qaýipti jáne qaýipsiz dep ekige jikteýdi qajet dep bilemiz», - dedi ol vedomstvoaralyq otyrysta.

Vıtse-mınıstrdiń sózine súıensek, ekologııalyq kodekske qaldyqtardy 6 aı merzimge deıin saqtaý týraly ózgerister engizilgen. Ókinishke oraı, norma tek qana qaldyqty shyǵarmaıtyn, kádege asyrý, qaıta óńdeý, qaldyqtaryn zalalsyzdandyrý úshin basqa oryndarǵa jóneltetin kásiporyndarǵa qatysty qoldanylady.

 Sondaı-aq Ǵanı Sádibekov zań jobasy jalpy salanyń damýyna tyń serpin beretinin atap ótti.

«Halyqaralyq talaptarǵa saı keltirý úshin atalǵan zańnyń júzege asýy qaldyqtarmen jumys atqarý, ekinshi shıkizat retinde qoldanatyndaı ony qaıta óńdeýge qol jetkizip, jasyl ekonomıka kontseptsııasyna ótýge muryndyq bolady», - dep túıdi vıtse-mınıstr.