Qazaqstanda óndiristegi jazataıym oqıǵalardan zardap shekkenderdiń sany ósti

NUR-SULTAN. QazAqparat - QR Eńbek jáne halyqty áleýmettik qorǵaý mınıstrligi eńbek quqyqtaryn qorǵaýǵa, óndiristik jaraqattanýdy tómendetýge jáne eńbek jaǵdaılary zııandy jumys oryndaryn qysqartýǵa baǵyttalǵan birqatar qujattar daıyndap jatyr. Bul týraly QR Eńbek jáne halyqty áleýmettik qorǵaý mınıstrliginiń keńeıtilgen alqa májilisinde vedomstvo basshysy Serik Shápkenov málim etti, dep habarlaıdy QazAqparat tilshisi.

Mınıstr óz sózinde laıyqty eńbek jaǵdaılaryn qamtamasyz etý jáne eńbek quqyqtaryn qorǵaý maqsatynda Qazaqstan kásiporyndarynda eńbek zańnamasynyń saqtalýyna turaqty monıtorıng jáne baqylaý júrgizilip otyratynyn aıtty.

«2020 jyly tekserý nátıjeleri boıynsha 4,4 myń jumys berýshi 7 myńnan astam talapty buzýshylyqty joıdy. 31 myńnan astam jumyskerdiń quqyqtary qorǵaldy, olarǵa jalaqy boıynsha 4,2 mlrd teńgeden astam bereshek tólendi. Sonymen qatar, jalaqy boıynsha bereshek máselesi áli de saqtalýda. Bıylǵy 31 qańtardaǵy jaǵdaı boıynsha 70 kásiporynda qaryz 837 mln teńgeni qurady. Bankrot nemese ońaltýdaǵy kásiporyndardaǵy bereshek erekshe alańdaýshylyq týǵyzady, onyń úlesi jalpy somanyń 78 paıyzyn qurady», – dedi S. Shápkenov.

Mınıstr sondaı-aq, eńbek qaýipsizdigi men eńbekti qorǵaýdy qamtamasyz etý aıasynda 2,7 myńnan astam kásiporyn halyqaralyq standarttardy engizgenin, 3 myńnan astam óndiristik nysan attestattalǵanyn habarlady. Іshki baqylaýdy 15 myńnan astam óndiristik keńester júzege asyrady.

2019 jylǵy 17 maýsymda Jenevada Eńbekmıni Halyqaralyq áleýmettik qamsyzdandyrý qaýymdastyǵymen «Vision Zero» nóldik jaraqattaný tujyrymdamasyn ilgeriletý týraly memorandýmǵa qol qoıdy. Respýblıkanyń 216 kásiporny osy tujyrymdamaǵa qosyldy.

2020 jyly óndiristegi jazataıym oqıǵalardan zardap shekkenderdiń sany 1 503 adamǵa ósken, al 2019 jylǵy 1 430 jaǵdaı bolǵan.

«Ákimdiktermen jáne áleýmettik áriptestermen birlesip, Áleýmettik áriptestik júıesin kúsheıtýge baǵyttalǵan keshendi qadamdar iske asyrylýda. 2021 jylǵy 1 qańtardaǵy jaǵdaı boıynsha iri jáne orta kásiporyndardyń 97,1 paıyzy jáne shaǵyn kásiporyndardyń 46,8 paıyzy ujymdyq sharttarmen qamtylǵan. Qyzmetkerlerdiń qysqarýyna jol bermeý maqsatynda ákimdikter men óńirlerdiń kásiporyndary arasynda ózara yntymaqtastyq týraly 131 myń memorandým jasaldy. Bul jumysty jandandyrý qajet, oblys ákimderiniń orynbasarlarynan eńbek qatynastaryn retteý máselelerin baqylaýǵa alýdy suraımyn. Eńbek daýlarynyń aldyn alý jáne olardy sheshý jónindegi keshendi jospardy jáne 2019-2023 jyldarǵa arnalǵan óndiristik jaraqattaný men eńbek jaǵdaılary zııandy jumys oryndaryn azaıtý jónindegi jol kartasyn iske asyrýdy qamtamasyz etý qajet», – dedi Serik Shápkenov.

Eńbekmıniniń basshysy QR Úkimeti men kásipodaqtar men jumys berýshilerdiń respýblıkalyq birlestikteri arasyndaǵy jańa Bas kelisimdi kelisý aıaqtalatynyn, ony qabyldaý eńbek qatynastarynyń teńgerimdi damýyn qamtamasyz etýge tıis ekenin aıtty.