Qazaqstanda óndirilgen taýarlardy 120-dan astam el tutynyp otyr
Osydan 10 jyl buryn elimizde ındýstrııalyq-ınnovatsııalyq damýdyń alǵashqy memlekettik baǵdarlamasy qabyldandy. Ol alǵashynda álemdik ekonomıkadaǵy daǵdarysqa qarsy shara retinde bastalyp, elimizdiń óńdeý ónerkásibin dáıekti túrde damytýdyń tıimdi quralyna aınaldy.
«Sodan bergi 10 jyl ishinde otandyq ónerkásip salasynda eleýli jetistikterge qol jetkizildi. Atap aıtqanda, ındýstrııalyq-ınnovatsııalyq damytýdyń baǵdarlamalary aıasynda 1250 joba iske qosyldy. 195 myńdaı jumys orny ashyldy, onyń ishinde 120 myń turaqty, 75 myń ýaqytsha jumys orny. Qazaqstanda buǵan deıin óndirilmegen 500-den astam ónim túri shyǵaryla bastady. Óńdeý sektorynyń ónerkásip qurylymyndaǵy úlesi 2009 jyly - 32% bolsa, 2018 jyly - 38% jetti, al ınvestıtsııadaǵy úlesi 17%-ten 19%-ke artty. Óndiris kólemi naqty kórsetkishte 42,3% artty. Ósimge eń úlken úles qosqan salalar: metallýrgııa ónerkásibi (42%), azyq-túlik óndirisi (13,7%), mashına jasaý (10,7%) jáne qurylys materıaldary óndirisi (10%)» delingen habarlamada.
Osy kezeńde otandyq ekonomıkaǵa 32 mlrd AQSh dollarynan astam tikeleı shetel ınvestıtsııasy tartyldy.
Óńdeý ónerkásibiniń qurylymy ózgerdi: avtomobıl ónerkásibi, iri temir jol mashınasyn jasaý, munaı-gaz salasyna mashına jasaý, kúrdeli tyńaıtqyshtar óndirisi sııaqty jańa baǵyttar qosyldy.
«Tıtan quımasy men qorytpasyn óndiretin zaýyt ashylǵan soń buǵan deıin Qazaqstanda óndirilmegen ónim – tıtan quımasy men qorytpalar óndirisi jolǵa qoıyldy. Qazaqstan tıtanynyń álemdik naryqtaǵy úlesi 11%, áýe-ǵarysh salasynda 17%-ke jetti. Mashına jasaý salasyndaǵy ónerkásip kólemi 3,8 ese ulǵaıdy. 11 farmatsevtıkalyq kásiporynnyń 20 óndiristik alańynda GMP halyqaralyq standarttary engizildi» dep málim etti mınıstrlikten.
Qurylys materıaldary óndirisi salasy kóptegen ónim túrleri boıynsha ımportqa táýeldilikten qutyldy. Indýstrııalandyrý jyldary shıkizattyq emes 70 taýar túri boıynsha óndiris kólemi ulǵaıyp, eksport jolǵa qoıyldy.
Búgingi tańda Qazaqstanda óndirilgen taýarlardy álemniń 120-dan astam elinde tutynady.