Qazaqstanda óndiriletin keıbir ónimder ımporttan da sapaly - Beıbit Atamqulov

NUR-SULTAN. QazAqparat – Bıyl ındýstrııalandyrý jobalarynda 17 myń turaqty jumys orny quryldy. Bul týraly QR Indýstrııa jáne ınfraqurylymdyq damý mınıstri Beıbit Atamqulov aıtyp berdi, dep habarlaıdy QazAqparat tilshisi.

«Jyl saıyn Indýstrııalandyrý kartasy aıasynda jobalar iske qosylady. 2015-2019 jyldary ishinde 5,2 trln teńgege 556 joba engizildi, 85 myń turaqty jumys orny quryldy. Al 2020 jyly ákimdikterdiń derekteri boıynsha 17 myńnan astam turaqty jumys ornyn quryp, 1,1 trln teńgege 160 jobany iske qosý josparlanýda», - dedi spıker Ortalyq kommýnıkatsııalar qyzmetinde ótken esep berý brıfınginde.

Mınıstrdiń aıtýynsha, ındýstrııalandyrý jyldary óńdeýshi ónerkásip salalaryn damytýda aıtarlyqtaı ózgerister boldy.

«Mysaly, jeńil ónerkásipte shaǵyn jáne orta bıznesti yntalandyra otyryp, biz osy salany is júzinde qaıta jandandyra aldyq. Qazirgi ýaqytta elimizde mata, kilem, balalar men eresekter kıimi, shulyq ónimderi, aıaq kıim, bas kıim jáne taǵy da basqa taýarlar óndiriledi. Bul rette olardyń sapasy ımporttyq ónimnen kem túspeıdi, keıde odan da asyp túsedi», - dedi B. Atamqulov.

Mınıstrdiń aıtýynsha, Qazaqstanda óńdeý ónerkásibinde 1 myńnan astam kompanııa jumys isteıdi, onda 17,9 myń adam eńbek etedi.