Qazaqstanda óńdelgen dándi daqyldardyń eksporty ulǵaıdy

ASTANA. QazAqparat - Aýyl sharýashylyǵy mınıstri Erbol Qarashókeev Brıýsselge sapary aıasynda eýropalyq komıssarlarmen kezdesti. Bul týraly QazAqparat AShM silteme jasap habarlaıdy.

QR AShM basshysy aýyl sharýashylyǵy jónindegi eýrokomıssar ıAnýsh Voıtsehovskıımen kelissózder barysynda el Úkimetiniń EO-men saýda-ekonomıkalyq áriptestikti odan ári keńeıtýge daıyndyǵyn atap ótti.

Qazaqstan joǵary sapaly organıkalyq azyq-túlik jetkizýshisi bolý úshin barlyq múmkindikterge ıe, dep atap ótti Erbol Qarashókeev. Atap aıtqanda, otandyq balyq ónimderin Eýroodaq elderine eksporttaý týraly sóz boldy. Tıisti kelissózder protsesteri aıaqtalýda, Frantsııa jáne Shveıtsarııamen qazaqstandyq balyq ónimderin satyp alýǵa kommertsııalyq ýaǵdalastyqtar bar. Aıta keteıik, ótken jyldyń qorytyndysy boıynsha qazaqstandyq balyqtyń EO elderine eksporty 1,5 esege artyp, 8,7 myń tonnany qurady. Negizgi tutynýshylar Polsha, Slovakııa, Chehııa, Nıderlandy, Lıtva, Latvııa, Danııa, Avstrııa jáne Germanııa boldy.

Sondaı-aq elimiz eýropalyq naryqqa bal, jylqy eti, sıyr eti men sút ónimderin jetkize alady.

Eýrokomıssar Stella Kırıakıdespen kezdesý barysynda Qazaqstan men EO elderi arasyndaǵy saýdany damytýdyń ózekti máseleleri talqylandy.

Atap aıtqanda, bıylǵy jyly kúshine engen mıkrobqa qarsy preparattardy profılaktıkalyq maqsatta qoldanýǵa tyıym salý týraly Eýropalyq zańnamaǵa engizilgen ózgerister eýropalyq memleketterden Qazaqstanǵa asyl tuqymdy maldy eksporttaý kezinde qıyndyqtar týǵyzady, dep atap ótti Erbol Qarashókeev. Osy máseleni retteý úshin mınıstr ekijaqty veterınarııalyq sertıfıkattarǵa ózgerister engizýdi saraptamalyq deńgeıde pysyqtaýdy usyndy. AShM basshysy sondaı-aq Qazaqstanǵa janýarlar aýrýlarynyń ákeliný qaýpin azaıtý boıynsha birlesken sharalardy ázirleý qajettigin atap ótti. Mal sharýashylyǵyn damytýdyń túrli baǵdarlamalary aıasynda elge Eýropalyq Odaq elderinen 57 myń asyl tuqymdy mal ákelindi.

Aıta keteıik, QR syrtqy saýdasynyń shamamen 30% EO-nyń úlesine tıesili. 2022 jyldyń qorytyndysy boıynsha aýyl sharýashylyǵy óniminiń taýar aınalymy 35,6% ósip, 995,5 mln dollardy qurady. Qazaqstanda zyǵyr, bıdaı, raps jáne óńdelgen dándi daqyldardyń eksporty ulǵaıdy.