Qazaqstanda ómirge kelgen sábıdiń qujattaryn rásimdeý jeńildeıdi

ASTANA. QazAqparat - Parlament Májilisindegi Úkimet saǵatynda QR  Aqparat jáne kommýnıkatsııalar mınıstri Dáýren Abaev ómirge kelgen sábıdiń qujattaryn rásimdeý sharalary aıtarlyqtaı jeńildeıtinin aıtty, dep habarlaıdy QazAqparat.

Mınıstrdiń atap ótýinshe,  memlekettik qyzmetterdi kórsetýdiń proaktıvti prıntsıpin tolyqtaı elektrondyq nusqada júzege asyrý jumystary júrgizilip jatyr. Mundaı jaǵdaıda adamdardyń arnaıy kelýi de qajet bolmaıdy.

«Mysaly, bala týǵanda, ata-anasyna týý týraly kýálik alý úshin balanyń aty-jónin, járdemaqylar taǵaıyndaý úshin shot nómirin jáne balabaqshaǵa kezekke qoıý úshin mekenjaıyn kórsetý usynysymen  avtomatty túrde SMS-habarlamalar keledi. Ótinish berýshi memkorporatsııaǵa memlekettik qyzmet nátıjesin alyp ketýi úshin ǵana keledi nemese úıge jetkizý qyzmetine tapsyrys bere alady», - dedi Dáren Abaev.

Budan bólek, vedomstvo basshysy jaqynda  Astanada memlekettik qyzmetterdi alý úrdisi tolyqtaı avtomattandyrylǵan Digital-HQKO iske qosylatynyn jáne onda operatorlar bolmaıtynyn aıtty. Tsıfrlyq HQKO ashylýy memlekettik qyzmetterdi usynýdyń jańa nusqasyna ótý kezeńi bolmaq. Ol jerde azamattar óz betinshe qoǵamdyq qoljetimdilik oryndary, «Connection point» ózine-ózi qyzmet kórsetý sektorlary jáne memkorporatsııanyń arnaıy stend-pavılondaryndaǵy planshetter arqyly elektrondyq ótinishter beredi.