Qazaqstanda ólimnen keıingi aǵza donorlyǵy mindetti bola ma – mınıstrlik jaýaby

<p>ASTANA. KAZINFORM &ndash; QR Densaýlyq saqtaý mınıstri Aqmaral Álnazarova elimizde ólimnen keıingi mindetti donorlyqty engizý múmkindigine qatysty pikir bildirdi, dep habarlaıdy Kazinfom tilshisi.</p>

«Jalpy, Qazaqstanda zań deńgeıinde adam qaıtys bolǵannan keıingi donorlyq tártibine qatysty jumys rettelgen. Degenmen, bul salada jetildiretin tustary bar shyǵar, biraq ol tek zańnamalyq bazaǵa baılanysty emes. Bul jerde halyqtyń densaýlyq saqtaý júıesine degen senimi óte úlken másele. Atap aıtqanda, osy saladaǵy máselelerdi egjeı-tegjeıli pysyqtaımyz», - dedi A. Álnazarova Senatta tilshiler suraǵyna jaýap bere otyryp.

Onyń aıtýynsha, aǵza donorlyǵyn damytý jumysy kezeń-kezeńimen júrgizilýi kerek.

«Meniń oıymsha, halyqtyń ózi buǵan daıyn bolýy kerek. Birinshiden, muny májbúrli túrde jasaýǵa bolmaıdy. Bizdegi zańnama aǵza donorlyǵyn durys uıymdastyrýǵa múmkindik beredi. Sondyqtan atalǵan máseleler boıynsha tıisti qadamdar jasap, aqparattyq jumys jáne halyqtyń qoldaýy arqyly osyny kezeń-kezeńmen iske asyrý kerek», - dep qosty mınıstr.

Jaqynda Densaýlyq saqtaý mınıstrligi Kazinform saýalyna joldaǵan jaýabynda qaıtys bolǵan adamnyń aǵzasyn transplantatsııaǵa paıdalaný máselesine qatysty túsinik berdi.