Qazaqstanda Ólketanýdy damytýdyń arnaıy tujyrymdamasy ázirlenedi
Bul týraly búgin Aqordada ótken QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń kezekti otyrysynda QR Prezıdenti Ákimshiligi basshysynyń orynbasary Ońdasyn Orazalın aıtty, dep habarlaıdy QazAqparat.
«Buǵan deıingi otyrysta aıtylǵan eskertýlerden keıin jumys birshama túzelip, kóptegen ákimderdiń «Týǵan jer» arnaıy baǵdarlamasyn júzege asyrý jumystaryna qatysýy belsendi bola tústi. Ótken jyly joba aıasynda 2 myńnan astam shara uıymdastyryldy. Bul baǵytqa shamamen 85 mlrd teńge bólinse, onyń 69 mlrd teńgesi demeýshilerdiń qarajaty», - dedi Ońdasyn Orazalın.
Degenmen, onyń atap ótýinshe, baǵdarlama aıasynda «Rýhanı jańǵyrý» ıdeologııasyna baılanysy joq sharalar da júzege asyrylady. Erterekte josparlanyp, jyldan-jylǵa qalyp kelgen sharalardyń da ótkizilý deregi bar.
«Muny Memleket basshysy da atap ótti. Osyǵan baılanysty mundaı sáıkessizdikke jol bergen laýazymdy tulǵanyń jaýapkershiligin arttyrý qajet. Memlekettik ınspektorlarǵa mundaı faktilerdi anyqtap, jolyn kesý, josparlanǵan sharalarǵa sáıkesinshe ózgerister men túzetýler engizý týraly tapsyrma berdik», - dedi Ońdasyn Orazalın.
QR Prezıdenti Ákimshiligi basshysy orynbasarynyń dereginshe, «Týǵan jer» baǵdarlamasy aıasynda búkil respýblıka boıynsha 700-den astam joba júzege asyrylǵan.
«Metsenattar esebinen 51 mlrd teńgeden astam demeýshilik kómek tústi. 735 nysan abattandyrylyp, qalpyna keltirildi. «Týǵan jer» baǵdarlamasy aıasynda 1438 nysan paıdalanýǵa berildi», - dedi Ońdasyn Orazalın.
Osy rette QR Prezıdenti Ákimshiliginiń basshysy, Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń tóraǵasy Ádilbek Jaqsybekov «Týǵan jer» jobasyn odan ary júzege asyrý aıasynda Bilim jáne ǵylym, Mádenıet jáne sport mınıstrlikterine Ólketanýdy damytýdyń arnaıy tujyrymdamasyn ázirleýdi tapsyrdy.