Qazaqstanda oqýshylar úshin jańa mádenı-bilim berý jobasy ázirlendi

NUR-SULTAN. QazAqparat - QR Mádenıet jáne sport mınıstrligi 2020 jylǵy qazan aıynan bastap mektep oqýshylarynyń adamgershilik jáne rýhanı turǵyda damýyna baǵyttalǵan «Ulaǵatty urpaq» mádenı-bilim berý jobasyn iske qosady, dep habarlaıdy QazAqparat tilshisi.

Vedomstvo málimetinshe, baǵdarlama uzaqtyǵy 10-15 mınýttan turatyn 1-11 synyp oqýshylary úshin beıne-dárister túrinde ázirlendi. Balalar úıden shyqpaı-aq Qazaqstannyń kıeli jerlerine vırtýaldy túrde saıahattaı alady. Sondaı-aq opera, balet, drama óneriniń ozyq úlgilerin kórip, qazaqstandyq jáne shetel kınofılmderi men mýltfılmderin tamashalap, ásem mýzykalyq shyǵarmalardy tyńdaı alady.

Oqýshylarǵa mmura.kz saıtynda mýzykalyq óner, teatr óneri, kınomatografııa, beıneleý óneri jáne Kıeli Qazaqstan atty 5 baǵyt boıynsha qazaq jáne orys tilderinde barlyq bilim berý beıne-dáristerine erkin qol jetkizýge múmkindik beriledi.

Ár beıne-dáristiń sońynda oqýshylar úsh suraqqa jaýap bere otyryp, ózderin teksere alady. Balalardyń erikti túrde qatysýy osy jobanyń qaǵıdatty sharty sanalady. Oqý jylynyń sońynda test suraqtaryna durys jaýap berip, joǵary upaı jınaǵan eń belsendi qatysýshylardy syılyqtar men jaǵymdy tosynsyılar kútedi.

«Osyndaı deńgeıdegi joba jas jáne jańa bilimge qumar urpaq úshin baǵdar beredi, elimizdiń senimdi azamattaryn tárbıeleýge kómegin tıgizedi jáne jigerge toly jas júrekterdi jaýlap alady degen senimdemiz» - dep atap ótti uıymdastyrýshylar.