Qazaqstanda oqýshylar arasynda Prezıdenttik olımpıada bastaldy

NUR-SULTAN. QazAqparat - Búgin Qazaqstanda jaratylystaný-matematıka baǵyndaǵy pánder boıynsha HІV Prezıdenttik olımpıadanyń respýblıkalyq kezeńi bastaldy, dep habarlaıdy QazAqparat Bilim jáne ǵylym mınıstrligine silteme jasap.

Bıyl mınıstrlik pen otandyq joǵary oqý oryndary arasynda qol jetkizilgen ýaǵdalastyqtyń nátıjesinde olımpıada jeńimpazdary JOO bilim grantyn jeńip alady.

Qorytyndy kezeń E.A. Bóketov atyndaǵy Qaraǵandy ýnıversıtetinde ótip jatyr. Olımpıada 15 qarasha bastalyp, 18 qarashaǵa deıin jalǵasady. Zııatkerlik baıqaýda elimizdiń barlyq óńirinen 182 oqýshy baq synaıdy.

Aıta keteıik, Prezıdenttik olımpıadaǵa 11 (12) synyp oqýshylary qatysady. Olarǵa tórt pán boıynsha — matematıka, fızıka, hımııa jáne bıologııadan tapsyrmalar beriledi.

«Biz oqýshylarymyzdy yntalandyrý jáne bolashaqta olar bilimin halyqaralyq olımpıadalarda kórsete alýyna barynsha jaǵdaı jasaý úshin ártúrli deńgeıdegi (aýdandyq, qalalyq, oblystyq, respýblıkalyq) olımpıadalardy daıyndap, ótkizemiz. Prezıdenttik olımpıada úsh kezeńde ótedi. Atap aıtsaq, aımaqtyq, irikteý jáne respýblıkalyq kezeń. Prezıdenttik olımpıadanyń birinshi (óńirlik) kezeńi qyrkúıek aıynda ótti, oǵan respýblıkanyń barlyq óńirinen 3 myńnan astam oqýshy qatysty. Ekinshi kezeńge 396 oqýshy ótti. Іrikteý kezeńi 22 qazanda bir mezgilde barlyq oblys ortalyǵynda jáne respýblıkalyq mańyzy bar qalalarda uıymdastyryldy. Osylaısha, qorytyndy respýblıkalyq kezeńge 182 oqýshy irikteldi. Prezıdenttik olımpıadanyń jeńimpazdary men júldegerleri QR BǴM-niń І, ІІ jáne ІІІ dárejeli dıplomdarymen jáne medaldarmen marapattalady. Sondaı-aq biz olımpıada jeńimpazdary úshin bilim granttaryn bólýge daıyn ekendikterin bildirgen birneshe joǵary oqý ornymen kelisimge qol jetkizdik», — dep atap ótti «Daryn» respýblıkalyq ǵylymı-praktıkalyq ortalyǵynyń dırektory Tımýr Nurkeshov.

Prezıdenttik olımpıadaǵa qatysýshylardyń jumysyn halyqaralyq olımpıadalardyń jeńimpazdary jáne júldegerleri, Qazaqstannyń jetekshi joǵary oqý oryndarynyń PhD doktorlary baǵalaıtyn bolady. Barynsha ashyqtyqty qamtamasyz etý úshin konkýrs onlaın túrde kórsetiledi. Beınetranslıatsııa siltemeleri «Daryn» RǴPO akkaýnttarynda usynylady.

Esterińizge sala keteıik, jaratylystaný-matematıkalyq baǵyttaǵy pánder boıynsha Prezıdenttik olımpıada 2008 jyldan beri ótkizilip keledi.

«Daryn» ortalyǵy jyl saıyn ótkizetin zııatkerlik baıqaý elimiz boıynsha daryndy oqýshylardy anyqtaýǵa jáne olardyń áleýetin iske asyrý barysynda qoldaý kórsetýge kómektesedi.