Qazaqstanda oqý jylyn maýsym aıynyń aıaǵyna deıin sozý usynyldy

NUR-SULTAN. QazAqparat - Sarapshylar men keıbir mektepterdiń ókilderi oqý jylyn maýsym aıynyń sońyna deıin uzartýdy usynyp otyr. Bul 2022-2023 oqý jylyndaǵy bilim protsesin uıymdastyrý máselelerin talqylaý maqsatynda uıymdastyrylǵan dóńgelek ústelde kóterildi, dep habarlaıdy QazAqparat Y.Altynsarın atyndaǵy Ulttyq bilim akademııasynyń baspasóz qyzmetine silteme jasap.

Oqý jylyn uzartýdy usynyp otyrǵan pedagogter qosymsha oqý aptalary bilim alýshylardyń kúndelikti oqý júktemesin azaıtýǵa kómektesetindigin alǵa tartyp otyr. Sonymen qatar, oqý jylyn uzartý «kúrdeli» taqyryptardy az ýaqytta ıgertý máselesin sheshedi. Sondaı-aq, jazǵy demalystyń uzaqtyǵyn qysqartý bilim alýshylardyń alǵan bilimin joǵaltpaýyna septigin tıgizedi.

«Bizdiń el oqý jylyndaǵy apta sany eń qysqa memleketterdiń biri 34 oqý aptasy. Nátıjesinde respýblıkamyzdyń bilim alýshylary jylyna 130 kúnnen astam demalady, bul álemdegi eń uzaq demalys desek bolady. Salystyratyn bolsaq: mysaly, Izraılde demalystyń uzaqtyǵy – 84 kún, Ońtústik Koreıada – 90 kún, Japonııada – 102 kún. Zertteýlerdiń nátıjesi, balalar uzaq úzilisten keıin ıgergen materıaldyń 25%-yn umytatynyn kórsetip otyr. Sondyqtan biz qazaqstandyq mektepterdegi oqý jylyn 38 aptaǵa deıin uzartýdy usynamyz - oqý jylyn 15 tamyzda bastap, 5 maýsymda aıaqtaýdy usynamyz. Nemese qyrkúıek aıynda ádettegideı bastalsa, onda 20 maýsymǵa deıin uzartý kerek», – dedi «BINOM SCHOOL» mektebiniń basqarýshy dırektory Araılym Maǵzumova.

«Ádilet» respýblıkalyq orta jáne mektepke deıingi bilim berý qaýymdastyǵynyń tóraıymy Dınara Qudaıqulova da óz sózinde oqý jylyn uzartý úshin ońtaıly dep sanaıtyn merzimderdi atap ótti: «20-25 tamyzdan bastap balalar shyǵýy kerek, shyn máninde eki apta boıy balalar oqý protsesine tolyǵymen kire almaıdy dep sanaımyz. 20-25 tamyzdan 5 maýsymǵa deıin kem degende uzartylýy kerek», - dedi ol.

Sarapshylar oqý jylynyń uzaqtyǵyn arttyrý synyptardaǵy júktemeni 1-2 saǵatqa qysqartýǵa, kabınet tapshylyǵyn ońtaılandyrýǵa, bilim alýshylardyń qosymsha bilim alýyna jáne pedagogterdiń ózderin kásibı damytýyna kóbirek ýaqyt bólýge múmkindik beretinine senimdi.