Qazaqstanda oqıtyn aýǵanstandyq stýdentter shekaradan qashan óte alady

NUR-SULTAN. QazAqparat – Qazaqstanda bilim alatyn Aýǵanstan stýdentteri qaıta kirýi úshin aımaqtaǵy jaǵdaı ábden turaqtanýy kerek. Bul týraly QR Syrtqy ister mınıstrligi Halyqaralyq aqparat komıteti tóraǵasynyń orynbasary – baspasóz hatshysy Aıbek Smadııarov aıtty, dep habarlaıdy QazAqparat tilshisi.

Qazaqstanda oqyp ketken aýǵanstan azamattarynan elge kelý týraly ótinishter tústi me? Túsken bolsa olardy kirgizý múmkindigi bar ma? Ortalyq kommýnıkatsııalar qyzmetinde ótken brıfıngide BAQ ókilderi QR Syrtqy ister mınıstriniń orynbasary Aqan Rahmetýllınge osyndaı saýal qoıdy.

«Qazaqstannyń Syrtqy ister mınıstrligine Aýǵanstannyń bizde oqyp ketken burynǵy stýdentteri júgingen joq. Eger júginip jatsa, ár adam boıynsha jeke tártipppen sheshim shyǵarylady. Dál qazir ol másele týraly eshteńe aıta almaımyz, ıAǵnı eshkim júgingen joq», - dedi mınıstrdiń orynbasary.

Al Aıbek Smadııarovtyń aıtýynsha, Qazaqstanda qazir bilim alyp jatqan stýdentterden oqýyn ári qaraı jalǵastyrý týraly ótinishter túsip jatqan kórinedi.

«Qazaqstanda qazir oqyp jatqan stýdentterdiń arasynda jazǵy demalys kezinde eline ketkender bar. Olar týraly málimetter túsip jatyr bizge. Oqýlaryn osyndaı jalǵastyrǵysy keletinderi bar. Biz bul áseleni baqylaýda ustap otyrmyz. Aýǵanstandaǵy jaǵdaı turaqtanǵan kezde bizdiń elshilik mindetti túrde olarǵa tıisti vıza beredi. Eki arada áýe nemese basqa kólik qatynasy qalypqa kelgen soń Qazaqstandaǵy oqýlaryn alańsyz jalǵastyra alady», - dedi Aıbek Smadııarov.