Qazaqstanda nıkotın ónimderine qoıylatyn tehnıkalyq reglamenttiń jobasy ázirlendi

NUR-SULTAN. QazAqparat – Elimizde bir rettik elektrondyq sıgaretti (veıp) ákelý men satýǵa tyıym salý maqsatynda qandaı sharalar qolǵa alynyp jatyr? Bul baǵytta memlekettik organdardyń ustanymy qandaı? Atalǵan depýtattyq saýalǵa QR Premer-Mınıstriniń orynbasary Eraly Toǵjanov jaýap berdi, dep habarlaıdy QazAqparat tilshisi.

«Eýrazııalyq ekonomıkalyq odaq sheńberinde quramynda nıkotın bar ónim keden odaǵy komıssııasynyń 2011 jylǵy 28 qańtardaǵy № 526 sheshimimen bekitilip, keden odaǵy sheńberinde mindetti talaptar belgilenetin ónimniń biryńǵaı tizbesine engizilgen. Qazirgi kezde Densaýlyq saqtaý mınıstrligi shuǵyl túrde quramynda nıkotın bar ónimge qoıylatyn mindetti talaptardy belgileıtin ulttyq tehnıkalyq reglamentiniń jobasyn ázirledi. Atalǵan joba qoǵamdyq talqylaýdan ótkennen keıin múddeli memlekettik organdarǵa kelisýge joldanatyn bolady», - dep jaýap berdi Eraly Toǵjanov depýtattyq saýalǵa.

Onyń aıtýynsha, elimizde talapqa sáıkes kelmeıtin bir rettik elektrondyq sıgaretterdi ákelýge jol bermeý jóninde shara qabyldanatyn bolady.

«Sondaı-aq, búgingi kúni Eýrazııalyq ekonomıkalyq odaqpen «Quramynda nıkotın bar ónimge arnalǵan tehnıkalyq reglament» tehnıkalyq reglamentiniń jobasy boıynsha jumys júrip jatyr. Osyǵan baılanysty quramynda nıkotın bar ónimge arnalǵan tehnıkalyq reglamentti qabyldanǵannan keıin Qarjy mınıstrligi talaptarǵa sáıkes kelmeıtin bir rettik elektrondyq sıgaretterdi ákelýge jol bermeý jóninde shara qabyldaıtyn bolady», - deıdi ol.

Úkimet basshysy orynbasarynyń málimdeýinshe, jasóspirimder men jastar arasynda veıpterdi tutynýdyń taralýy máselesi múddeli memlekettik organdardyń qatysýymen birneshe ret talqylandy.

«Qazirgi tańda mınıstrlik veıpterdiń Qazaqstandaǵy aınalymyna tyıym salý boıynsha normalardy «Halyq densaýlyǵy jáne densaýlyq saqtaý júıesi týraly» kodekske engizý jumysyn júrgizýde», - dedi E. Toǵjanov.