Qazaqstanda nesıelik seriktestikter jumysynda qandaı ózgerister bolady

NUR-SULTAN. QazAqparat - QR Aýyl sharýashylyǵy mınıstri Saparhan Omarov nesıelik seriktesterdiń problemalary týraly aıtty, dep habarlaıdy QazAqparat tilshisi.

Aıta keteıik, búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine agroónerkásiptik keshendi retteý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.

«Nesıelik seriktestikter júıesin qaıta qaraý kózdelýde. Búginde barlyq nesıelik seriktestikter bir ǵana qorlandyrý kózine, ıaǵnı bıýdjetke táýeldi bolyp otyr. Qarjyldandyrýdyń ózge kózderin tartý múmkindigi joq. Shyndyǵynda, nesıelik seriktestikter qazir tyǵyryqqa tireldi. Eger shara qoldanbasaq, nesıelik seriktestikter toqyraýǵa ushyraıdy», - dedi mınıstr.

Osyǵan baılanysty «Kredıttik seriktestikter týraly» Zańǵa nesıelik seriktestikterge ortalyq nesıe seriktestigin qurýǵa múmkindik beretin túzetýler engizildi.

«Ortalyq nesıelik seriktestikterge de nesıelik seriktesterdiń qyzmetin retteıtin jalpy talaptar qoldanylatyn bolady», - dep naqtylady vedomstvo basshysy.

Sonymen qatar, zań jobasymen nesıelik seriktestik qatysýshylarynyń jalpy jınalysyn ótkizý tártibi men merzimin naqtylaıtyn túzetýler engizilmek.

«Josparlanyp otyrǵan ózgerister nesıelik seriktestikterge, agroónerkásiptik keshen sýbektilerine nesıe berý úshin bıýdjetten tys qosymsha qarjy tartýǵa múmkindik beredi», - dedi Saparhan Omarov.