Qazaqstanda nemis kapıtalymen 450 kásiporyn jumys isteıdi
«Kezdesý barysynda taraptar saıası jáne saýda-ekonomıkalyq saladaǵy qazaqstan-german yntymaqtastyǵynyń qazirgi jaǵdaıy men keleshegin talqylady. Sondaı-aq, ekijaqty qarym-qatynasty odan ári keńeıtý men nyǵaıtýǵa baǵyttalǵan mindetteme rastaldy», - delingen mınıstrliktiń habarlamasynda.
Sonymen qatar, 2017 jyldyń shildesinde Astanada ótken QR Prezıdenti Nursultan Nazarbaev pen GFR Prezıdenti Frank-Valter Shtaınmaıer arasynda jasalǵan kelissózdiń nátıjesinde qol jetkizilgen ýaǵdalastyqtardy júzege asyrý máseleleri talqylandy.
«Germanııa Qazaqstannyń Eýropalyq Odaqtaǵy mańyzdy jáne strategııalyq áriptesi. Biz ekijaqty yntymaqtastyq aıasyn keńeıtýge, atap aıtqanda Qazaqstan naryǵyna nemis ınvestıtsııalaryn jáne tehnologııalaryn tartýǵa múddelimiz. Syrtqy ister mınıstrligine júktelgen jańa mindetter aıasynda bizdiń yntymaqtastyǵymyz jańa serpin alady», - dedi mınıstr Beıbit Atamqulov.
Habarlamada aıtylǵandaı, nemis elshisi Qazaqstanmen qarym-qatynasty damytý Germanııa dıplomatııasynyń Ortalyq Azııa aımaǵyndaǵy basymdyqtarynyń biri ekendigin atap ótti. Jáne de Tılo Klınner Qazaqstan ekonomıkasyn odan ári jańǵyrtý josparlaryn quptap, birlesken jobalardy júzege asyrýda járdemdesýge daıyn ekenin bildirdi.
Mınıstrlik deregine súıensek, 2005 jyl men 2018 jyldyń qarasha aıy aralyǵynda Germanııadan Qazaqstanǵa 8,6 mlrd AQSh dollaryn quraıtyn ınvestıtsııa tartyldy. Odan bólek, ótken jyldyń qańtar-qarasha aıyndaǵy ekijaqty taýar aınalymy 1,9 mlrd AQSh dollaryn quraıdy. Sondaı-aq, búgingi kúni Qazaqstanda nemis kapıtalymen 450 kásiporyn jumys isteıdi.