Qazaqstanda nekeni tirkeý merzimi qysqartylady

NUR-SULTAN. QazAqparat – Qazaqstanda nekeni tirkeý merzimi eki ese qysqartylady. Mundaı jańashyldyq QR Ádilet mınıstrliginiń jańa buıryǵynda kózdelgen, dep habarlaıdy QazAqparat tilshisi.

Mınıstrliktiń osy jyldyń 28 shildesinde qol qoıylǵan buıryǵyna sáıkes, nekege otyrýǵa (erli-zaıypty bolýǵa) tilek bildirgen adamdardyń kelisimi boıynsha tirkeýshi organ nekeni tirkeý kúnin taǵaıyndaıdy. Bul týraly ótinishte, sondaı-aq ótinishterdi esepke alý jýrnalynda belgi qoıylady.

Neke birlesken ótinish berilgennen keıin kelesi jumys kúninen bastap esepteletin kúntizbelik on besinshi kúni tirkeledi. Eger merzimniń aıaqtalýy jumys kúnine týra kelmese, onda odan keıingi jumys kúni merzimniń aıaqtalǵan kúni bolyp esepteledi.

Degenmen, tirkeýshi organ bastyǵynyń sheshimimen neke kelesi jaǵdaılarda 15 kúnge deıin qıylýy múmkin: júktilik, balanyń týýy, taraptardyń biriniń ómirine tikeleı qater tónýi jáne basqa da erekshe mán-jaılar. Barlyǵy qujat júzinde rastalýy tıis.

Tirkeýshi organ bastyǵy nekege turý merzimin uzarta da alady. Biraq ol kúntizbelik on bes kúnnen aspaýǵa tıis.

«Jekelegen jaǵdaılarda neke qııýdy memlekettik tirkeýdi kútý merzimi neke qııýdy memlekettik tirkeýge kedergi keltiretin mán-jaılar bolǵan kezde ǵana tirkeýshi organnyń bastamasy boıynsha uzartylýy múmkin. Kúntizbelik on bes kúndi qysqartý týraly nemese ulǵaıtý týraly ruqsatty tirkeýshi organnyń bastyǵy, al ol bolmaǵan kezde onyń mindetin atqarýshy adam neke qııý týraly ótinishke qarar túrinde beredi», - delingen qujatta.

Buıryq alǵashqy resmı jarııalanǵan kúninen keıin kúntizbelik on kún ótken soń qoldanysqa engiziledi.