Qazaqstanda ne sebepti veıpke tyıym salynbaǵan

ASTANA. QazAqparat – Ulttyq ekonomıka mınıstri Álibek Qýantyrov Qazaqstanda veıpke tyıym salý protsesine qatysty pikir aıtty, dep habarlaıdy QazAqparat tilshisi.

Búgin Májilistegi Úkimet saǵatynan keıin tilshiler mınıstrge veıpke qatysty suraq qoıdy.

Bul turǵyda qoǵamda veıpke tyıym salý máselesinde Ulttyq ekonomıka mınıstrligi tıisti sheshim jasamaı otyrǵany aıtyldy.

Óz kezeginde Á. Qýantyrov atalǵan tyıym salý tetigin engizý ázirge Retteýshilik áserdi taldaý qaǵıdatyna sáıkes kelmeı turǵanyn jetkizdi.

«Ádettegideı Ekonomıka mınıstrligin kinálap jatyr. Retteýshilik áserdi taldaý degen bar. Bul rette, bıznestiń múddesine nuqsan keltirmeý úshin tıisti zańnamalyq retteý tártibi (jańa zań jobasy, erejeler) osy protsesten ótýi kerek. Tıisti zań jobasyn ázirleıtin árbir ýákiletti organ Retteýshilik áserdi taldaý protsesinen ótýi kerek. Alaıda Densaýlyq saqtaý mınıstrligi ony jarty jyldan beri ótkize almaı otyr. Biz ony qaıta pysyqtaý úshin birneshe ret qaıtardyq. Óıtkeni olar muny atalǵan taldaý protsesi erejelerine sáıkes jasamaǵan», - dep túsindirdi vedomstvo basshysy.

«Sonymen qatar, shaǵyn jáne orta bıznesti de oılaýymyz kerek. Atalǵan mınıstrlik bárin durys jasaǵanda, biz tıisti qadamdy jasaýǵa daıynbyz. Óz basym veıpterge tyıym salýdy qoldaımyn», - dedi Á. Qýantyrov.

Budan buryn habarlanǵandaı, bıyl mamyr aıynda Májilistiń jalpy otyrysynda depýtat Nurgúl Taý jasóspirimder arasynda veıpter keńinen tarap jatqanyn aıtty.

Jaqynda Densaýlyq saqtaý vıtse-mınıstri Vıacheslav Dýdnık elimizde oqýshylardyń 10% elektrondy temeki nemese veıp tartyp júrgenin aıtty.