Qazaqstanda naryqtyń qatań olıgopolııalyq qurylymy qalyptasty - Jumanǵarın

ASTANA. QazAqparat - Qazaqstanda naryqtyń qatań olıgopolııalyq qurylymy qalyptasty. Bul týraly búgin Astanada «Naryqtyq bılikti aıqyndaý jáne kartelderdi tergep-tekserý ádisteri» taqyrybyndaǵy konferentsııada QR UEM Tabıǵı monopolııalardy retteý jáne básekelestikti qorǵaý komıtetiniń tóraǵasy Serik Jumanǵarın málim etti.

«2015-2016 jyldary biz 71 taýarlyq naryqqa taldaý júrgizdik. Ol ne kórsetti? Taýarlyq naryqtardyń 4,3 paıyzy ornyqty shoǵyrlanǵan jáne 95,7 paıyzy joǵary túrde shoǵyrlanyp otyr. Otyn energetıkalyq keshenniń naryqtarynda 48,5 paıyz, ónerkásiptik baǵytta 17,6 paıyz, agroónerkásiptik keshende - 16,2 paıyz, qarjy - 8,8 paıyzdy, sondaı-aq basqa naryqtarda 8,8 paıyzdy qurap otyr. Bul neni bildiredi? Atap aıtqanda, búginde bizde naryqtyń qatań olıgopolııalyq qurylymy bar jáne osy naryqtarǵa kirý úshin eleýli kedergiler baıqaldy. Sondyqtan da osy naryqtarǵa jasalǵan taldaý nátıjesi boıynsha ekonomıkalyq úderisterdi retteýdiń tıisti sharalaryn qabyldaý qajettigi týraly 16 usynys engizdik»,-dedi S. Jumanǵarın.

Olıgopolııa naryǵynyń negizgi erekshelikteri: naryqta basym fırmalar bolady, olardyń sany kóp emes; Olıgopolııalyq fırmalardyń naryqtyq úlesteri kóp bolady, sondyqtan baǵaǵa monopolııalyq bılik júrgize alady. Olıgopolııalyq naryqtyń basty sıpaty - fırmalar bir birimen tyǵyz baılanysta jáne ózara táýeldilikte bolady. Baǵa men ónim kólemin anyqtaǵanda árbir fırma óziniń básekelesteriniń yqtımal reaktsııasyn eskerýge májbúr bolady. Salaǵa jańa fırmalardyń kirýine aıtarlyqtaı kedergiler qoıylady.