Qazaqstanda munaıdyń barreli 20 dollarǵa deıin tómendegen jaǵdaıda ekonomıkany damytý nusqalary qarastyrylǵan - Elbasy

ASTANA. QazAqparat - Munaıdyń barreline baǵa 30-20 dollarǵa deıin tómendegeni jaǵdaıynda Qazaqstanda is-qımyl nusqalary oılastyrylǵan. Bul týraly búgin Qazaqstan halqyna Joldaýynda Elbasy Nursultan Nazarbaev málim etti.

«Qazirgi jahandyq daǵdarys bizge kenetten kelgen joq. Men daǵdarystyń jalǵasyp kele jatqanyn, onyń jańa tolqyny bolatynyn birneshe márte aıtqan bolatynmyn. Osy joly Qazaqstan alǵash ret aldyn ala áreket etýdiń daǵdarysqa qarsy strategııasyn qoldanýda», - dedi Elbasy. Osy oraıda, Prezıdent ındýstrıalyq-ınnovatsııalyq damýdyń ekinshi besjyldyǵy bastalǵanyn, ıaǵnı shıkizattyq resýrstardan táýelsiz ekonomıka qurylyp jatqanyn atap ótti. Sonymen qatar, ekinshiden, ınfraqurylymdyq damýdyń «Nurly jol» memlekettik baǵdarlamasy qabyldandy. Daǵdarysqa qarsy sharalardyń mańyzdy aspektisi ulttyq valıýtanyń erkin baǵamǵa kóshýine baılanysty bolyp otyr. Sonymen qatar Qazaqstanda qajetti memlekettik qor men altyn-valıýta rezervteri jınaqtaldy. «Meniń tapsyrmam boıynsha budan buryn aıtqanymdaı, munaıdyń barreline baǵa 30-ǵa jáne 20 dollarǵa deıin tómendegen jaǵdaıda is-qımyldardyń oılastyrylǵan nusqalary ázirlendi»,- dedi N.Nazarbaev.