Qazaqstanda munaıdy esepke alý júıesi 2021 jyly iske qosylady
Energetıka mınıstrligi Tsıfrlyq damý, ınnovatsııalar jáne aeroǵarysh ónerkásibi mınıstrligime birlesip, «UAT» AQ bazasynda munaı men gaz kondensatyn esepke alýdyń aqparattyq júıesin tolyqqandy rejımde iske qosady. Mehanızm tutynýshyǵa jetkizýge daıyndalǵan aınalymdaǵy shıki munaı men gaz kondensatynyń mólsheri týraly derekterdi jınaý, óńdeý, saqtaý jáne paıdalaný protsesin avtomattandyrýǵa múmkindik beredi.
«Aqparattyq júıe daıyndyqtan, tasymaldaýdan, saqtaýdan, tıep-jóneltýden, ótkizýden, Qazaqstannan tysqary jerlerge ákelýden jáne áketýden bastap munaı men gaz kondensatyn esepke alýdyń tıimdi quraly retinde qurylǵan. Sondaı-aq bul esepterdi tapsyrý kezinde adamı faktor qateleriniń azaıýyna jáne qaǵaz qujat aınalymy úlesiniń qysqarýyna ákeledi.
Munaı men gaz kondensatyn esepke alý júıesi munaı óndirý, tasymaldaý jáne qaıta óńdeý salasynda jumys isteıtin kásiporyndardyń qoldanystaǵy aqparattyq júıelerimen ıntegratsııalanady. Óndirý, daıyndaý, qaıta óńdeý, tasymaldaý, saqtaý, ótkizý, tıep-jóneltý, Qazaqstannan ákelý jáne áketý kólemderi týraly barlyq derekter aqparattyq júıege beriledi. Kompanııalar ornatylǵan esepteý quraldaryn ishki baqylaý retinde nemese basqa maqsattar úshin paıdalana alady», delingen habarlamadaú
Ýákiletti organ jedel derekter negizinde memlekettik deńgeıde shuǵyl sheshim qabyldaıtyn, gaz kondensaty munaıynyń aınalymyn boljaıtyn, materıaldyq teńgerimdi avtomatty túrde esepteı alatyn jáne esepke alý aspaptarynan alynǵan derekter negizinde esepter qalyptastyra alady.
Bul rette, naqty aqparat alý úshin barlyq derekter ár uıymnan jeke qabyldanady, al esepter kásiporynnyń qyzmetine baılanysty qalyptasady. Mysaly, munaı tasymaldaý uıymdary óndirýshi uıymdardan munaıdy qabyldaý, munaı óńdeý uıymdaryna jáne eksportqa tapsyrý boıynsha esepterdi beredi.
«Búgingi tańda júıe pılottyq rejımde iske qosylǵan jáne oǵan 3 munaı tasymaldaýshy uıymy qosyldy: – «QazTransOıl», «MunaıTas» jáne «Qazaqstan-Qytaı qubyry». «Kaspıı qubyr konsortsıýmy» qosylý satysynda tur. Bıyl júıege Qazaqstannyń munaı óndirisiniń jalpy kóleminiń 60%-yn qamtamasyz etetin birqatar uıymdy qosý josparlanýda. 2021-2022 jyldary MEAJ-ǵa barlyǵy 3 munaı óńdeý zaýyty, 16 shaǵyn MÓZ, 4 munaı tasymaldaý uıymy jáne 100 jer qoınaýyn paıdalanýshy derekter jiberedi», delingen habarlamada.