Qazaqstanda múmkindigi shekteýli jandarǵa qyzmet kórsetetin portal iske qosyldy
«Bıyl Amazon jáne AliBaba sııaqty servısterdiń qaǵıdaty boıynsha múgedektigi bar adamdar úshin aleumet.egov.kz portaly iske qosyldy. Bul tsıfrlyq joba kelesi múmkindikterge qol jetkizedi: Ońaltý quraldary men qyzmetterin óz betinshe tańdaý quqyǵy, olardy alý merzimin alty aıdan 15 kúnge deıin qysqartý, bıznes protsesteriniń ashyqtyǵy, deldaldyq qyzmetteri joıý, baǵany birizdi etý jáne bıýdjet qarajatyn tıimdi paıdalaný», - dep atap ótti mınıstr.
Búginde portalda ońaltý quraldary men qyzmetteriniń 1157 jetkizýshi tirkelgen jáne 24 myńnan astam tehnıkalyq ońaltý quraly berildi. Portalǵa tolyq kóshý tehnıkalyq ońaltý quraldarynyń barlyq 55 túri boıynsha 400 myńǵa jýyq alýshyny qamtı otyryp, 2021 jyldyń qańtarynan bastap, júzege asyrylatyn bolady.
Aıta keteıik, Qazaqstanda 705 myńnan astam múgedektigi bar adam turady. Onyń ishinde 430 myńy – eńbekke qabiletti jastar, 181 myńy – zeınet jasynda jáne 94 myńy – balalar. Bıyl áleýmettik tólemderge, ońaltýdyń tehnıkalyq quraldary men qyzmettermen qamtamasyz etýge 448 mlrd teńge baǵyttaldy. Bul ótken jylmen salystyrǵanda 12 paıyzǵa artyq.
«Elimizde múgedektigi bar adamdardyń quqyqtaryn qamtamasyz etý jáne turmys sapasyn jaqsartý jóninde 2025 jylǵa deıingi ulttyq jospar iske asyrylýda. Ulttyq jospar jeti baǵytty qamtıtyn 64 is-sharadan turady. Ol múgedektiktiń aldyn alý, bilimge qoljetimdilik, kedergisiz orta, jumyspen qamtý, tıimdi ońaltý, áleýmettik qyzmetter jáne qoǵamdyq sanany jańǵyrtý qyzmetteri. «Halyq únine qulaq asatyn memleket» qaǵıdattaryna sáıkes, múgedek jandar men qoǵamnyń pikirin eskere, biz osy jyly múgedektik merzimsiz belgilenetin qaıtymsyz anatomııalyq kemistikter tizbesin keńeıttik. Ońaltý boljamy qolaısyz adamdar úshin merzimder bes jylǵa deıin uzartyldy. Bala bes jylǵa nemese 16 jasqa deıin múgedek bolyp tanylatyn kórsetilimder keńeıtildi», - deıdi Birjan Nurymbetov.