Qazaqstanda múgedekter men ardagerler «lıýks» avtokólikterine salyqtyq jeńildikter ala almaıtyn bolady

ASTANA. 24 qyrkúıek. QazAqparat - QR Ekonomıka jáne bıýdjettik josparlaý mınıstrligi jańa zań jobasynda halyqtyń keıbir toptaryna "lıýks" avtokólikterine salyqtyq jeńildikter qarastyratyn bapty alyp tastamaq.

Bul týraly búgin mınıstrliktiń Salyq jáne bıýdjettik saıasat departamentiniń bastyǵy Mádı Takıev málim etti. "Múgedekter, Uly Otan jáne Aýǵan soǵysynyń ardagerleri, sonymen qatar jeńildikke ıe ózge de toptar kóliginiń qozǵaltqyshy 4 tekshe santımetrden aspaıtyn jaǵdaıda bul jeńildikterge ıe bola alady. Áńgime 4 tekshe santımetrden asatyn, ıaǵnı "lıýks" sanatty kólikterdiń salyǵyna qatysty bolyp otyr", - dep atap kórsetti departament basshysy. Onyń aıtýynsha, qazirgi tańda elde joǵary sanatty avtokólikterdi jeńildikke ıe adamdardyń atyna jazyp qoıý úrdisi keńinen damyǵan. Bir zeınetaqyǵa ómir súrip otyrǵan zeınetker asa qymbat kólikke ıe bolyp otyrǵany aqylǵa qonbaıdy. "Mysaly, Almatyda 188 "Hammer" kóliginiń 18-i Uly Otan soǵysy ardagerleriniń atynda tur. 83 "Bentlı" kóliginiń úsheýi múgedekterge jazylǵan. 827 "Leksýstyń" 65-i Uly Otan, Aýǵan soǵysynyń ardagerlerine jáne múgedekterge tıesili eken", - dedi M. Takıev.