Qazaqstanda monopolııaǵa qarsy jańa zań ázirlenedi
«Bul tapsyrmalar blogyn búkil memlekettik apparat jumysynyń basymdyǵyna aınalýǵa tıis eń ótkir máselelerdiń birimen aıaqtaǵym keledi. Ol – básekeni damytý. Búgingi tańda eldiń ekonomıkasy memlekettiń qatty aralasýynan ǵana emes, jeke monopolısterdiń básekeden tys áreketterinen de zardap shegip otyr. Olardyń qatarynda memlekettiń ózi qurǵan biryńǵaı operatorlardy, jeke monopolııalardy da atap ótýge bolady. Sol sebepti Básekelestikti qorǵaý jáne damytý agenttigine osyndaı qurylymdardy ustaýdyń qajettiline taldaý júrgizýdi tapsyramyn», - dedi Qasym-Jomart Toqaev Úkimettiń keńeıtilgen otyrysynda.
Prezıdenttiń aıtýynsha, bizdiń elde osyndaı 50-ge tarta monopolııa bar.
«Óz usynystaryńyzdy 1 maýsymǵa deıin maǵan ákelińizder. Artynsha ne isteý kerektigin sheshemiz. Olardy bálkim mártebesinen aıyramyz, kerek bolsa tipti jabamyz. Úkimet pen Básekelestikti qorǵaý jáne damytý komıtetine 2022 jylǵy 1 qańtarǵa deıin adal básekelestikke kedergi keltirip turǵan negizgi problemalardy sheshýge baǵyttalǵan zań jobasyn qabyldaýdy tapsyramyn», - dedi Memleket basshysy.
Prezıdent osy zań qabyldanǵanǵa deıin memlekettik jáne jeke operatorlardy qurýǵa tyıym salynýy kerektigin eskertti.
«Atalǵan zań naryq sýbektilerine teń jaǵdaı jasaýǵa baǵyttalýǵa tıis. Maǵan kásipkerlerden temirjol jelileriniń podezd joldarynyń jekelegen basshylaryna shaǵym kóp túsip jatyr. Olar jyljymaly quramnyń ótip ketýine ruqsat alýdyń ózi qııamet-qaıymǵa aınalǵanyn jazady. Al olarda óteıin dese basqa jol joq. Bul ýchaskelerdi jekeshelendirý kezinde adal bastamalardy kútip edik, aqyry sózge kónbeıtin monopolıster paıda boldy. Básekelestikti qorǵaý jáne damytý agenttigine Bas prokýratýramen birge podezdik jol operatorlarynyń jumysyn tekserýdi tapsyramyn», - dedi ol.