Qazaqstanda monoqalalar jyldam damıtyn bolady

ASTANA. QazAqparat - Qazaqstanda monoqalalar 2018 jyldan bastap tez damıtyn bolady. Buǵan bólinetin qarajat 5 esege - 37,8 mlrd teńgege deıin artady, dep habarlaıdy QazAqparat finprom.kz saıtyna silteme jasap.

2017 jyly monoqalalar men shaǵyn qalalardy salýǵa «2020 jylǵa deıingi óńirlerdi damytý baǵdarlamasy» boıynsha 7,2 mlrd teńge bólinedi, bul ótken jylmen salystyrǵanda, eki esege tómen.

Degenmen, 2018-2020 jyldarǵa arnalǵan respýblıkalyq bıýdjet týraly zań jobasyna sáıkes, kelesi jyly «úshinshi deńgeıdegi» qalalardy qarjylandyrý  5 esege ulǵaıyp, 37,8 mlrd teńgege jetedi. Al 2019 jyly ol 55,4 mlrd teńgege deıin artady.

2017 jyly damytý baǵdarlamasynyń ınfraqurylymdyq jobalary 7 óńirde ǵana júrgizilýde: Qaraǵandy, Shyǵys  Qazaqstan, Jambyl, Atyraý, Pavlodar, Qostanaı jáne Almaty oblystarynda. 9 monoqalada 14 joba iske asyrylatyn bolady.

Eń kóp qarajat Qaraǵandy oblysyna baǵyttalady - 3,3 mlrd. Onyń 1,3 mlrd teńgesi - Shahan kentinde qazandyq pen jylý júıelerin salýǵa, 1,2 mlrd teńgesi Prıshahtınskide jylý magıstralin qaıta jańartýǵa baǵyttaldy. Ekinshi orynda ShQO - 1,5 mlrd teńge. Úshinshi orynda Jambyl - 1 mlrd teńge.

Atap óteıik, 2018 jyly bıýdjettik baǵdarlamamen «úshinshi deńgeıdegi» barlyq qala (27 monoqala, 41 shaǵyn qala) qamtylatyn bolady.  70-ten astam joba maquldanady.